امریکی الس جنگ انا برخلاف فیصلہ تسنے، اسپیکر ایرانی پارلیمنٹ

تہران، اسپیکر ایرانی پارلیمنٹ باقر قالیباف پارینے کہ امریکی الس جنگ انا برخلاف فیصلہ تسنے‘ راجی رابطہ نا ویب سائٹ ایکس آ تینا بیان اٹی باقر قالیباف پارے کہ امریکی الس ضمیر نا توار ءِ بنگ و پاش وڑ اٹ جنگ آن نمن مس‘ نن ہم امریکی الس نا دا کلہو نا مخ تفی ءِ کینہ۔ اسپیکر ایرانی پارلیمنٹ پارے کہ امریکی حکومت بلیک میل کروک آتا فائدہ غاتیکن کاریم کرے تو اودے شکست مریک‘ ایلو کنڈآ امریکی مڈ ٹرم گچین کاری تا بنائی نتیجہ غاتا رِد اٹ ایوانِ نمائندگان اٹی ڈیموکریٹک اومتیدوار آتے ریپبلکنز آ سرسہبی دوئی ءِ وخت اس کہ سینٹ نا نتیجہ غاتے ٹی ہم ڈیموکریٹس نا سرسہبی رپورٹ کننگاسس۔ امریکی صدر ڈونلڈ ٹرمپ گچین کاری تا نتیجہ غاتے امنا کننگ نا پڑو ءِ کرسا پارے کہ ایران تون جنگ گچین کاری تیٹی ریپبلکنز نا بے سہبی نا اسہ سوب اس جوڑ مس، او ڈیموکریٹس تون اوار مرسا کاریم کننگ آ امنائی نا درشانی ءِ کرے، ولے داڑتون اوار دا ہم پارے کہ کنے لگک کہ امنا مفروک گام گیج آتے صدارتی ویٹو نا کمک اٹ توروہ۔