پاکستانی امب آتا ترکیہ نا منڈی اسکان رسینگ ءِ آسان جوڑ کننگ و برآمد آتے ٹی ودکی نا گرج ءِ، جام کمال

استنبول، بنجائی وزیر واپار جام کمال خان استنبول اٹ اقتصادی و واپاری کمکاری نا تنظیم (کومسیک) نا 42 می دیوان نا وخت آ ترکیہ نا وزیر واپارپروفیسر ڈاکٹر عمر بولات تون اوڑدہی کرے وتین پہ تینی واپارنا مونی دننگ، پاکستانی کشاری گڑاتا برآمد آتے ٹی ودکی و پاکستان اٹ ترک زرکاری ءِ سوگوکننگ آگپ وتران کریر۔ ہڑتوم آ وزیرک تین پہ تینی اقتصادی و واپاری فائدہ غاتا بابت باندات آسرجمی اٹ گپ وتران کریر و پاکستان و ترکیہ نا نیام اٹ واپاری تعلقداری تے پین سوگو کننگ نا ارادگی نا درشانی ءِ کریر۔ بنجائی وزیر جام کمال خان باسپتی برنج نا بابت پاکستان نا روا دعویٰ تا پبی مخ تفی آ ترکیہ نا منت ءِ ہرفے وجہانی منڈی تیٹی پاکستان نا بڑزکو آب انا کشاری گڑاتا رکھ و مونی دننگ کن پدریسہ کمکاری نا اہمیت آزور شاغا۔ بنجائی وزیرواپار ترک کمپنی تیکن پاکستان اٹ زرکاری نا وارخواہی تے تالان کرسا خاص وڑ اٹ کراچیانڈسٹریل پارک اٹ ترک کاروباری ادارہ غاتے کن جتا اسہ ہزار ایکڑ ڈغار نا ذکر ءِ کرے۔ او ترک کاروباری ادارہ غاتے دا وارخواہی آن فائدہ ہرفنگ، صنعتی یونٹ جوڑ کننگ و پاکستان اٹ تینا پیداواری سرجزوزرکاری ءِ ودفنگ نا سلہ خلک۔ جام کمال خان پاکستان نا کشاری برآمدآتا لائخی تے تالان کرسا پاکستانی امب آتا ترکیہ نا منڈی اسکان رسینگ ءِ آسان جوڑ کننگ و برآمد آتے ٹی ودکی کن ترک حکومت آن کمک نا خواست کرے۔ داوخت آ ترک وزیر واپار پروفیسر ڈاکٹر عمر بولات ترکیہ ٹی پاکستانی باسپتی برنج نا گچین تشہیر و برانڈنگ نا اہمیت آ زور شاغسا پارے کہ داڑان ترک مارکیٹ اٹی پاکستانی برنج نا ساڑی گری و صارف آتیٹی اونا درستی راستی ءِ پین سوگو کننگ اٹ کمک رسینگک۔ ترک وزیر واپارپاکستانی امب آتا درآمد آتے ٹی ودکی کن پورو کمکاری نا باوری کرفے و ہڑتوم آملک آتا نیام اٹ کشاری واپار ءِ ودفنگ نا گمان تے امنا کرے۔ اوڑدہی ٹی اسہ اہم پیشرفت نا وڑاٹ پروفیسر ڈاکٹر عمر بولات ہڑتوم آ کنڈآتا واپاری نظام نا جاچ ءِ ہلنگ و واپاری تعلقداری تے پین گچین کننگ کن عملی گام گیج پٹنگ نا گرج اٹ ترک کمامدار آتا اسہ ڈل اس پاکستان آ گدریفنگ آ امنا کرے۔