پاکستان کن ننا وفاداری بے شڑت ءِ، بلوچستان نا باتیک ہم ملک انا بریبر شاری ءُ،وزیراعلیٰ میر سرفراز بگٹی

لاہور، وزیراعلیٰ بلوچستان میر سرفراز بگٹی پارینے کہ پاکستان کن ننا وفاداری بے شڑت ءِ، بلوچستان نا مقدمہ و دا جاگہ نا الس نا حقی ویل آتے مونی اتنگ نا پن آ منہ تپہ غاتا کنڈ آن کنفیوژن و گمراہ کروک بیانیہ تالان کننگ انگ ءِ۔ بلوچستان ءِ دا وخت آ مسہ بھلو چیلنج مون تروک ءِ‘ ہرافتے ٹی بیداد ءِ روا گوندوک آ بیانیہ، سلہہ بند دہشت گردی و سوشل میڈیا نا کمک اٹ ورنا تا ذہن سازی اوار ءُ۔ دہشتگرد آک بلوچستان نا بنیادی پنجر ءِ بھس کننگ اٹی ءُ و کودک آ پاکستانی تے خلنگ اٹی ءُ، ہچ ءُ محرومی یا سیاسی اختلاف اسے بیداد نا جواز جوڑ کننگ مننگ کپک۔ بلوچستان نا ویل آتا ایسری توفک آخا بلکہ تعلیم، ہیت و گپ، سیاسی عمل و جمہوری وڑ و ڈول اٹی ءِ۔ دا خیال آتا درشنی ءِ او شنبے نا دے لاہور اٹی یونیورسٹی آف مینجمنٹ اینڈ ٹیکنالوجی (یو ایم ٹی) نا کانووکیشن آن تران کرسا کرے۔ وزیراعلیٰ میر سرفراز بگٹی پارے کہ پاکستان تون ننا وفاداری بے شڑت ءِ و بلوچستان نا الس ہم دا ملک انا بریبر نا شاری ءُ۔ صوبہ نا حقی ویل، احساسِ محرومی و شونداری گرج آتے پہہ مننگ المی ءِ، ولے دا ویل آتے بنداو جوڑ کرسا جتائی خواہنگ بیداد نا مخ تفی کننگ یا اودے جواز اس پیش کننگ ہچ گہس جوان اف۔ منہ تپہ وخت اس پسماندگی‘ وخت اس محرومی و وخت اس ایلو ویل آتے سلہہ بند بیداد تون گنڈسا ہندن ءُ بیانیہ اس ٹہیفرہ ہراڑان راستیک تہاری ٹی تمرہ۔ او پارے کہ بلوچستان نا حالیت آتیا تران کروک تجزیہ نگار آتا زمواری ءِ کہ او راستی تا بنداو آ ہیت کیر و بیداد ءِ ہچ گہس امنا کننگ نا کوشست کپس‘ او پارے کہ بلوچستان ءِ مون تروک ارٹمیکو بھلا چیلنج سلہہ بند بیداد ءِ، ہراڑے دہشتگرد سلہہ بند ٹولی تا دروشم اٹی بندغ آتے شست کننگ اٹی ءُ، معصوم شاری تے خلنگ اٹی ءُ و صوبہ نا بنداوی پنجر ءِ بھس کننگ اٹی ءُ۔ دہشت گردی بیرہ انسانی ساہ تا نسخان آخا بلکہ بلوچستان نا شونداری، زرگزرانی سرجز، تعلیم و الس نا گچین آخبت نا کسر اٹی ہم اڑاند ءِ۔ اختلاف رائے و سیاسی خواست آتا حق ہر شاری ءِ دوئی ءِ، ولے توفک نا کمک اٹ تینا فکر ءِ ایلوفتا بیٹ کننگ اسُل امنا کننگ مفک‘ وزیراعلیٰ مسٹمیکو چیلنج نا نشاندہی ءِ کرسا پارے کہ سوشل میڈیا نا کمک اٹ خاص وڑ اٹ ورنا چین ءِ غلط معلومداری و منفی پروپیگنڈہ نا ہدف جوڑ کننگ انگ ءِ ورناتے دا سُج پام تروئی تمکو کہ او ہر حوال‘ دعویٰ و بیانیہ ءِ پٹ وپول و راستی تا وڑ جاچ کیر۔ یونیورسٹی و تعلیمی ادارہ غاتا کڑد بیرہ ڈگری تننگ آخا بلکہ ہندن ءُ سیوتی‘ زموار و تنقیدی فکر تخوک شاری تیار کننگ ہم ارے ہرافک راج اٹی مثبت کڑد ادا کننگ کیر۔ میر سرفراز بگٹی یونیورسٹی آف مینجمنٹ اینڈ ٹیکنالوجی نا کنڈ آن بلوچستان نا طالب علم آتے تروک آ اسکالرشپ آتا ستا ءِ کرسا پارے کہ اودے داڑان خوشی مسنے کہ یو ایم ٹی بلوچستان نا ورناتے بڑزکو تعلیم نا وارخواہی فراوان کرینے۔