پاکستان نا گوازی تیٹی جہانی چیمپئن مننگ نا شرفمندی ستا کڑزک،جعفرخان مندوخیل

کوئٹہ، ایوب اسٹیڈیم کوئٹہ ٹی پاکستان پروفیشنل باکسنگ ایسوسی ایشن نا کنڈآن ایماندار عبدالغنی مینگل میموریل انٹرنیشنل باکسنگ چیمپئن شپ 2026ء سرسہبی اٹ ایسر مس۔ گڈیکو دود انا خاص انگا مہمان گورنر بلوچستان جعفرخان مندوخیل ئس۔ چیمپئن شپ اٹی پاکستان، اوغانستان و ایران نا 60 باکسر بشخ ہلکر۔ فائنل مقابلہ غاتیٹی چار باکسر سرسہبی دوئی کریر۔ پاکستان نا گولڈ باکسر نجیب اللہ گولڈ میڈل کٹا۔ علی احمد و ایران نا دانیال شاہ ہم نمان کارکڑد نشان تسر‘ پاکستانی فیمیل باکسر بس بانو ہم تینا لائخی تا درشانی ءِ کرسا گوازی نا شوقی تا چکار ءِ دوئی کرے۔ دود اٹی صوبائی وزیر میر عاصم کرد گیلو، نوراللہ لہڑی، اسپورٹس تون تعلقدار اہم شخصیت‘ منتظمین و گوازی نا شوقیک بشخ ہلکر۔ دا وخت آ گوازی گر تا است بڈی و عزت افزائی کننگا و اوفتا سرسہبی تا ستا کننگا۔ گورنر بلوچستان جعفرخان مندوخیل تینا تران اٹی پارے کہ پاکستان ءِ جہانی کہول آ کیہی گوازی تیٹی جہانی چیمپئن نا شرف دوئی ءِ و بلوچستان نا گوازی گر تیٹی ہم بے کچ لائخی ارے‘ گرج دا ہیت انا ءِ کہ اوفتے تینا لائخی تے نشان تننگ کن جوان وارخواہی و پوسکنوڑ آسراتیک فراوان کننگر۔ او پارے کہ اسپورٹس ڈیپارٹمنٹ کن بھلو کچ اسے ٹی فنڈ جتا کننگانو ہرافتے بھرمی کاریم اٹ اتنگ ءِ پک کننگے تاکہ گوازی تا شون، گوازی گر تا ہیلکاری، ترقی و جہانی کہول آ نمائندگی نا وارخواہی تے ودفنگ آ خڑچ کننگ مرے۔