پولیو آن پاک راج اسے نا ٹہیفنگ ننا کل انا اسیجائی زمواری ءِ،ڈپٹی کمشنر قلات انجینئر عائشہ زہری

قلات، وزیراعلیٰ بلوچستان نا پرمان نارد اٹ پولیو فری مہم نا رد اٹ ڈپٹی کمشنر قلات انجینئر عائشہ زہری چناتے پولیو آن بچفنگ نا پڑی کنفسا مچ آ ضلع ٹی چار دے ئی پولیو مہم تور نا باقاعدہ بناءِ کرے۔ دا وخت آ ایڈیشنل ڈپٹی کمشنر شاہنواز بلوچ، ڈسٹرکٹ ہیلتھ آفیسر ڈاکٹر عبدالمالک، ایم ایس ٹیچنگ ہسپتال ڈاکٹر سومار خان، ڈی ایم پی پی ایچ آئی جہانگیر زہری و ڈپٹی ڈی ایچ او ڈاکٹر محمد اقبال نورزئی اسک ہم چناتے پڑی کنفیر و اوفتا فنگر مارکنگ ءِ کریر۔ ڈسٹرکٹ ہیلتھ آفیسر ڈاکٹر عبدالمالک ڈپٹی کمشنر قلات ءِ چار دے ئی پولیو مہم نا بابت بریفنگ ترسا معلومدار کرے کہ پولیو مہم 2 نومبر 2026ء آن بنا کرسا 5 نومبر 2026ء اسکان برجا سلک۔ مہم نا وخت آ ضلع قلات نا 19 یونین کونسل آتیٹی پنچ سال اسکان نا وئی نا 40,269 چناءِ پولیو آن بچفنگ نا پڑی کنفنگ نا ہدف پک کننگانے۔ ڈپٹی کمشنر قلات انجینئر عائشہ زہری پارے کہ پولیو ویکسین ٹیمک ہر اُراغا ہنسا پنچ سال اسکان نا وئی انا کل چناتے پولیو آن بچفنگ نا پڑی کنفنگ ءِ پک کیر۔ ایریا سپروائزر پولیو ٹیم تا گچین چاروکی ءِ کیر و مہم نا وخت آ اسہ چنا اسے ہم پڑی کنفنگ آن محروم مننگ کن الیپس۔ او پارے کہ پولیو مہم ءِ سرسہب کننگ کن لمہ باوہ، سیاسی و راجی کارندہ، عالم دین‘ شاعر، ادیب و صحافی برادری تینا مثبت و گچینکڑد ءِ ادا کیر۔ پولیو آن پاک راج اسے نا ٹہیفنگ ننا کل انا اسیجائی زمواری و بنداوی مسخت ءِ۔