مدرسہ و جمعیت ءِ ودیکاری نا پن آ بلیک میل کننگ مفک،مولانا عبدالرحمن رفیق

کوئٹہ، جمعیت علماء اسلام ضلع کوئٹہ نا امیر مولانا عبدالرحمن رفیق، سیکرٹری جنرل حاجی عین اللہ شمس، سینئر نائب امیر مولانا خورشید احمد، مولانا محب اللہ، مولانا محمد ایوب، شیخ مولانا عبدالاحد محمدحسنی، مولانا سعید احمد، حافظ سراج الدین، مفتی محمد روزی خان بادیزئی، مولانا محمد شعیب جدون، رحیم الدین ایڈووکیٹ و مولانا محمد عارف شمشیر تون اوار ایلو راہشونک تینا اسیجائی بیان اٹی پارینو کہ ہرا بندغ آتیا مچ آ ملک اٹی آئین، کانود و السی و قبائلی ڈغار تیا ناروا کوزہ نا دوبہ غاک اریر اوفک ہرا اخلاقی و کانود نا رد اٹ الس ءِ ودیکاری نا پن آ نوٹس جاری کننگ اٹی ءُ؟ قائد جمعیت مولانا فضل الرحمن ءِ ودیکاری نا پن آ بلیک میل کننگ و اونا سیاسی جہد ءِ شیف خلنگ نا کوشست آک آمخ ءُ۔ تدوک آ کیہی دہائی تیان جمعیت علماء اسلام نا سرکڑدہ غاتا ہندا وڑ انا وڑ و زوراکی مون تروئی تمانے ولے تاریخ شاہد ءِ کہ دن انگا وڑک جمعیت نا اصولی سیاست و جمہوری جہد انا کسر ءِ توننگ کتنو۔ او پاریر کہ مفتی محمود مرکز، مولانا فضل الرحمن نا اُرا یا مدرسہ اسے نا رد اٹ ودیکاری نا نوٹس جاری کننگ آن مست تعلقدار کمامدار آتے منظور کروک نقشہ، کانودی دستاویزات و راستکی تا جاچ ءِ ہلوئی تمک‘ اگہ ماڑی یا تفوئی کاریم نا بابت وڑ اسے نا کانودی اعتراض ساڑی ءِ تو اودے شفاف کانودی وڑوڈول نا رد اٹ ایسر کننگے، نہ کہ سیاسی زوراکی و بیرہلوک کارروائی نا سوب جوڑ کننگے۔