طالبان حکومت ٹی ٹی پی، فتنۃ الخوارج، بی ایل اے و فتنہ الہندوستان ءِ پناہ تننگ اٹی ءِ،دفتر خارجہ پاکستان

اسلام آباد، ترجمان دفتر خارجہ پارینے کہ طالبان حکومت ٹی ٹی پی، فتنۃ الخوارج، بی ایل اے و فتنہ الہندوستان ءِ پناہ تننگ اٹی ءِ۔ ترجمان دفتر خارجہ نا کنڈ آن جاری کروک بیان اٹی پاننگانے کہ پاکستان نا دہشت گردی تور کارروائی تیٹی شاری تا خلنگ انگ نا دوبہ غاک سٹی ءُ، گمراہ کن بیانیہ غاک اوغان ڈغار آن کاریم کروک دہشت گرد نیٹ ورک آتا خطرہ ءِ ڈکنگ کپسہ، طالبان حکومت اوغان ڈغار ءِ پاکستان آ جلہو تیکن کاریم اٹ اتنگ آن توننگ نا زموار ءِ۔ ترجمان پارے کہ یو این مانیٹرنگ رپورٹ آک ہم طالبان حکومت نا دہشت گرد تنظیم آتے پناہ تننگ آ گڑتی نا درشانی ءِ کیرہ، طالبان حکومت ٹی ٹی پی، فتنۃ الخوارج، بی ایل اے و فتنہ الہندوستان تون اوار دہشت گرد تنظیم آتے پناہ تننگ اٹی ءِ۔ ترجمان دفتر خارجہ پارے کہ اوغان ڈغار آن ڈٹ بندی و مالی کمکاری اٹ مروک آ دہشت گرد جلہو آتیٹی ہزار آ پاکستانیک شہید مسنو، پاکستان تینا شاری تا و سیکورٹی فورس آتیا پدریسہ جلہو تا مون آ چُپ سلنگ کپک، پاکستان نا کارروائیک حقِ دفاع نا رد اٹ و گڈیکو کسر نا دروشم اٹی کننگار، پاکستانی کارروائیک اوغانستان اٹی بیرہ دہشت گرد آتیا و اوفتا لاجسٹک ہند آتیا کننگار۔ ترجمان مستی پارے کہ پاکستان خطرہ نا سوب آن ورندی ٹی کارروائی کرے و احتیاط و فرق انا اصول آتیا عمل کرے، جہانی برادری اوغان طالبان حکومت ءِ یو این سلامتی کونسل نا قرارداد آتیا عملدرآمد نا پابند جوڑ کے، وفغان ڈغار ءِ دہشت گردی کن کاریم اٹ اتنگ آن توننگ اوغان طالبان حکومت نا زمواری ءِ، پاکستان تینا وتواجہی، علاقائی سالمیت و شاری تا رکھ کن المی گام گیج آتا حق ءِ تخک۔