تعلیم، جان جوڑی و شونداری نا ہدف آتیکن اسیجائی کوشست المی ءِ، لال جان جعفر

کوئٹہ، سیکرٹری تعلیم بلوچستان لال جان جعفر پارینے کہ تعلیم، جان جوڑی، غذائیت و مدامگی شونداری نا ہدف آتا دوئی کننگ کن اسیجائی کوشست المی ءِ۔ گچین آخبت نا جوڑ کننگ کن حکومتی ادارہ، جہانی تنظیم و تعلیمی ادارہ غاتے تین پہ تینی کمکاری نا کمک اٹ گچین کڑد ادا کروئی مریک۔ داخیال آتا درشانی ءِ او گورنمنٹ گرلز ہائی اسکول جناح ٹاؤن کوئٹہ ٹی اقوام متحدہ نا دے 2026 نا رد اٹ اڈ ہلوک دود آن خاص انگامہمان نا وڑ اٹ تران کرسا کرے۔ دود انا بنجائی سرحال گچین اواری، گچین آخبت ئس ” ہرانا مسخت تین پہ تینی کمکاری، مدامگی شونداری والسی راجی آسودہی نا مونی دننگ ءِ تالان کننگ ئس۔ اقوام متحدہ نا صوبائی پروگرام ٹیم انا کنڈ آن ون یو این (ONE UN) نا پلیٹ فارم نا رداٹ اڈ ہلوک دا دود اٹی بلوچستان اٹ اقوام متحدہ نا سرجز، مدامگی شوندار ی نا ہدف(SDGs) و جتا جتا بشخ آ تیٹی حکومت بلوچستان تون کمکاری نا بابت آگاہی فراوان کننگا۔ دا وخت آ اقوام متحدہ نا صوبائی پروگرام ٹیم انا چیئرمین ذوالفقار درانی بلوچستان اٹ اقوام متحدہ نا برجاگام گیج و مدامگی شوندار ی نا ہدف آتا دوئی کننگ کن حکومتی کمکاری ءِ مون آ تخا۔ کوئٹہ نا ڈسٹرکٹ ایجوکیشن آفیسر نصیر شاہ و اسکول نا پرنسپل عابدہ مینگل اسک ہم تران کریر۔ دود اٹ خوانوک آ مار و مسنک چناتا غذائیت، جان جوڑی و تندرسی نا سرحال آاسہ معلوماتی خاکہ اس پیش کریر، وخت اس کہ کچن گارڈننگ نا سرجز آتا کمک اٹ جان جوڑ کنشت و جوان غذاو غذائیت نا اہمیت ءِ تالان کننگا۔ دوداٹی اقوام متحدہ نا دے انا رداٹ اہم کلہو آتے ہم بشخ ہلوک آتسکان سرکننگا۔ اخیر اٹ ڈاکٹر فارعہ احسن کل مہمان، بشخ ہلوک و منتظم آتا منت واری ءِ ہرفے۔