پاکستان و امریکہ نا توانائی نا بشخ اٹی تین پہ تینی کمکاری ءِ ودفنگ آ امنا

اسلام آباد، پاکستان و امریکہ توانائی نا بشخ اٹی ہڑتوم آکنڈآن کمکاری ءِ ودفنگ آ امنا کرینو۔ دا امنائی بنجائی وزیر پٹرولیم علی پرویز ملک تون امریکی ناظم الامور نیٹلی اے بیکر نا اوڑدہی ٹی مس۔ نیامی دے ٹِک نا حالیت آتا رد اٹ پاکستان نا توانائی سلامتی و ایندھن نا بے اڑاند فراوانی نا گام گیج آتیا گپ وتران کننگا۔ امریکی ناظم الامور نیٹلی اے بیکر پارے کہ امریکہ پاکستان نا توانائی گرج آتے پورو کننگ کن خڑک کمکاری نا خواہندار ءِ، پاکستان اٹی امریکی کمپنی تیکن کاروباری وارخواہی ودی کننگ المی ءِ، پاکستان و امریکہ نا نیام اٹی مریس وختی توانائی فراوانی نا معاہدہ غاک ہڑتوم آ ملک آتیکن فائدہ نا سوب مننگ کیرہ۔ پی ایس او و پی ایل ایل نا ایم ڈیز نا امریکی کمپنی تا ایل این جی فراوانی ٹی استخواہی تون تعلقدار دیوان ءِ بریفنگ تننگا و بنجائی وزیر پٹرولیم علی پرویز ملک امریکی ناظم الامور ءِ توانائی گرج آتا رکھ اکن پاکستان نا گام گیج تیان آگاہ کرے۔ امریکی ناظم الامور نیٹلی اے بیکر ایندھن نا فراوانی نا حالیت ءِ بھرمی وڑ اٹ سنبھالنگ آ پاکستان نا ستاءِ کرے۔ بنجائی وزیر پٹرولیم علی پرویز ملک پارے کہ پاکستان تینا توانائی گرج آتا رکھ اکن سنبرینگوک ءِ، پاکستان و امریکہ نا ٹیمک توانائی نا بشخ اٹی کمکاری نا پوسکن آ وارخواہی تے پٹنگ اٹی ءُ، پاکستان نا ریفائنری تا اپ گریڈیشن نا ڈٹ آک امریکی مالیاتی ادارہ غاتیکن زرکاری نا وارخواہی فراوان کننگ کیرہ۔ بنجائی وزیر پٹرولیم علی پرویز ملک امریکی کمپنی تے پاکستان منرلز انویسٹمنٹ فورم اٹی بشخ ہلنگ نا سلہ خلک و پارے کہ پاکستان نا معدنیاتی بشخ اٹی زرکاری نا بھلو وارخواہی ساڑی ءُ، امریکی کمکاری و تین پہ تینی رابطہ غاتا شون تننگ پاکستان نا مریس وختی توانائی سلامتی ءِ سوگو جوڑ کننگ اٹی کمکار مریک، بنجائی وزیر پٹرولیم علی پرویز ملک توانائی نا بشخ اٹی امریکی کمکاری آ اونا منت واری ءِ ہرفے۔