بلوچستان اٹی سیکورٹی فورس آتا کارروائیک سوگو ارادگی نا ڈیک ءُ،وزیراعلیٰ میر سرفراز بگٹی

وزیراعلیٰ بلوچستان میر سرفراز بگٹی کوئٹہ، نوشکے و خضدار اٹی دہشت گرد آتا برخلاف سیکورٹی فورس آتا سرسہب کارروائی تا ستاءِ کرسا پارینے کہ بلوچستان اٹی دہشت گردی نا چٹفنگ کن سیکورٹی فورس آتا گچین و وخت آ کارروائیک اوفتا کسبی لائخی‘ سنبرینگوکمننگ نا و قومی سلامتی نا رکھ انا ارادگی نا ڈیک ءُ۔ وزیراعلیٰ پارے کہ کوئٹہ، نوشکے و خضدار اٹی بھارتی مخ تف ٹی کاریم کروک 8 دہشت گرد ءِ خلنگ سیکورٹی فورس آتا اہم ءُ سرسہبی اسے۔ پنجپائی ٹی دہشتگرد تا کنڈ آن کسر آ ناکہ بندی نا کوشست ءِ بے سہب کننگ ہم سیکورٹی فورس آتا وخت آ کارروائی و سنبیرنگوک مننگ نا شاہدی ءِ۔ میر سرفراز بگٹی پارے کہ نوشکے ٹی دہشت گرد آتا ہند آن سلہہ و بارود نا دوئی کننگ خضدار اٹی 490 کلوگرام منچر نا دوئی مننگ دہشت گردی نا گمانی گڑتی تتون مون تننگ کن اہم ءُ پیشرفت اسے۔ سیکورٹی حوالی تا رد اٹ بلوچستان اٹی سیکورٹی فورس آتاسرسہب کارروائی تیٹی 8 بھارتی مخ تف دہشتگرد خلنگار۔ کوئٹہ، نوشکے و خضدار اٹی انٹیلی جنس بیسڈ آپریشن کننگا، بھلو کچ اسے ٹی سلہہ و منچر دوئی کننگا‘ صدر مملکت سیکورٹی فورس آتے خراجِ تحسین پیش کرے و پارے کہ دہشت گرد آتا پیشن نا کاٹم خواجہ و اوفتا ہندی کمکار آتا سازش آتے بے سہب کننگک۔ آئی ایس پی آر نا رِد اٹ بلوچستان اٹی سیکورٹی فورس آک سرسہب کارروائی کرینو‘ ہرافتے ٹی 8 بھارتی مخ تف دہشت گرد خلنگار و بھلو کچ اسے ٹی سلہہ و منچر دوئی کننگا۔ کوئٹہ، نوشکے و خضدار اٹی انٹیلی جنس بیسڈ آپریشن کننگا۔ کوئٹہ نا علاقہ پنجپائی ٹی کارروائی ٹی سیکورٹی فورس آک ٹریفک ءِ توننگ نا کوشست کروک 5 بھارتی مخ تف دہشت گرد آتے دوزخی کریر۔ نوشکے ٹی دہشت گرد آتا ہند بھس کننگا، ہڑتوم آ کنڈآن سم کاری اٹ 2 دہشتگرد خلنگار، بھلو کچ اسے ٹی سلہہ و منچر دوئی کننگا۔ خضدار اٹی دہشت گردی نا کوشست بے سہب مس۔ فورس آتا وخت آ کارروائی آن اسہ دہشت گرد اس خلنگا، 490 کلوگرام وزنی منچر دوئی کننگا۔ ترجمان پاک فوج انا رِد اٹ عزمِ استحکام نا رد اٹ کارروائیک برجا ءُ، ملک آن پیشن نا کاٹم خواجہی ٹی مروک دہشت گردی نا چٹفنگ اسکان آپریشن آک پورو ترندی اٹ برجا سلرہ۔ ایوانِ صدر نا میڈیا ونگ آن جاری بیان نا رِد اٹ صدرِ مملکت آصف علی زرداری بلوچستان نا ضلع کوئٹہ، نوشکے و خضدار اٹی مسہ جتاجتا انٹیلی جنس بیسڈ آپریشن اٹ 8 بھارتی کاٹم خواجہی ٹی کاریم کروک دہشت گردآتے خلنگ آ سیکورٹی فورس آتے خراجِ تحسین پیش کرے۔ صدر زرداری کوئٹہ نا علاقہ پنجپائی ٹی ہندی ٹریفک ٹی اڑاند ودی کننگ نا کوشست بے سہب کننگ و دہشتگرد آتے خلنگ آ سیکورٹی فورس آتاکسبی لائخی تا ستاءِ کرے۔ صدرِ مملکت نوشکے ٹی دہشتگرد آتا ہند انا برخلاف گچین کارروائی و دہشتگرد آتے خلنگ آ ہم سیکورٹی فورسز آتے خراجِ تحسین پیش کرے۔