دانش اسکولز نا طالب علم آتا سرسہبی ایلو چنا تے کن درور اسے،وزیراعظم شہبازشریف

اسلام آباد، وزیراعظم محمد شہباز شریف پارینے کہ دانش اسکولز نا طالب علم آتا سرسہبیک ایلوفتیکن درور ءُ، طالب علم آتا سرسہبیک دا ہیت انا شاہدی ءُ کہ وارخواہی رسینگ آ محروم تپہ نا چناک ہم مون آ ہننگ کیرہ، آب اٹنگا تعلیم و بریبر وارخواہی تا فراوانی المی ءِ، پاکستان نا لکھ آ ہشار و لائخ انگا ورنا تا شونداری ٹی کل آن بھلا اڑاند مالی وسیلہ غاتا کمتی ءِ، مالی مشکل آتا سوب آن اسہ ہشار ءُ چناس ہم بایدے آب اٹنگا تعلیم آن مُر سلپ۔ دانش اسکول اسلام آباد نا بنائی دود آن تران کرسا وزیراعظم شہباز شریف پارے کہ آب اٹنگا تعلیم و بریبر وارخواہی تا فراوانی المی ءِ، اینو وزیراعظم پاکستان نا حیثیت اٹ آخا بلکہ الس نا حقی خذمتگار نا وڑ اٹ نم تون اوار اُٹ‘ دانش اسکول تون تعلقدار دستاویزی فلم‘ طالب علم آتا ہیت و فارغ التحصیل طالب علم آتا سرسہبی تے خنسا است بھاز خوش مس، دانش اسکولز نا طالب علم آتا سرسہبیک بھاز خوش کروک ءُ، خیبرپختونخوا غان تعلقدار خصوصی لائخی والا مسڑ نا جہد، سرسہبی، اومیت و حوصلہ نا روشنا ءُ درور اسے، مسڑ اومیت نا دامن ءِ ہچ گہس یلہ کتنے، خصوصی لائخی تا سوب آن مسڑ نا کسہ بدل مفروک ارادگی نا داستان ءِ، او اسہ عظیم ءُ پاکستانی، خواری کش، باوقار و علم دوست باوہ نا مسڑ ءِ، غریب باوہ تون مسڑ نا تعلیم کن مالی وسیلہ اَلوکہ۔ وزیراعظم پارے کہ خواری کش لمہ باوہ بھلا باسنی و یخ اٹی حلال روزی کٹرہ، کچ اٹنگا وسیلہ غاتا سوب آن لمہ باوہ چناتا تعلیم و جانجوڑینا خڑچ آتے پورو کننگ کپسہ، پاکستان نا لکھ آ ہشار و لائخ انگا ورنا تا شونداری ٹی کل آن بھلا اڑاند مالی وسیلہ غاتا کمتی ءِ، ننا ورناک بھاز ہشار، جوزہ و زند آن شُپ ءُ، پاکستانی ورنا تیٹی تینا زند آتے بدل کننگ و ملک انا آخبت ءِ جوڑ کننگ نا لائخیک اریر‘ ورناک تینا ہشاری، خواری و باقاعدہ کوشست آتیان پاکستان ءِ دنیا نا راج آتیٹی نمان جاگہ تننگ کیرہ۔