بلوچستان اٹ فتنہ الہندوستان نا برخلاف سیکورٹی فورس آتا آپریشن ستا کڑزک،وزیراعظم محمد شہباز شریف
آپریشن اٹ دہشت گرد آتیان پوسکن وڑ سلہہ وگولہ بارود ہم دوئی مس ہرا مون تروک چیلنج آتا سنگینی ءِ درشان کیک
Get real time updates directly on you device, subscribe now.
اسلام آباد، وزیراعظم محمد شہباز شریف بلوچستان اٹ فتنہ الہندوستان نا برخلاف سیکورٹی فورس آتا آپریشن “ردالفتنہ 3” انا رداٹ سرسہب کارروائی نا ستاءِ کرسا پارینے کہ سیکورٹی فورس آتا سرسہب کارروائی دہشت گرد آتا برخلاف ننا بدل مفروک قومی ارادگی نا درشانی ءِ۔ چارشنبے نا دے آوزیراعظم آفس نا میڈیا ونگ انا کنڈآن جاری بیان نا رد اٹ وزیراعظم پارے کہ سیکورٹی فورس آک ضلع واشک نا علاقہ پلانتک اٹ انٹیلی جنس بیسڈ آپریشن اٹ 5 دہشت گرد ءِ دوزخی کریر ہرا ستاکڑزک۔ وزیراعظم پارے کہ آپریشن اٹ دہشت گرد آتیان پوسکنوڑ سلہہ و منچر ہم دوئی مس ہرا مون تروک چیلنج آتا سنگینی ءِ درشان کیک۔ وزیراعظم پارے کہ سیکورٹی فورس آتا کنڈآن برجا سرسہب کارروائی دہشت گرد آتا برخلاف ننا بدل مفروک قومی ارادگی نا درشانی ءِ۔ دہشت گردی نا برخلاف اسیجائی قومی ارادگی اصل اٹ ملک انا امن و سلامتی نا ضامن ءِ۔ وزیراعظم پارے کہ سیکورٹی فورس و کانود نافذ کروک ادارہ غاتا افسر و ورناک قومی سلامتی کن بھلو قربانی تننگ ءُ۔ سیکورٹی فورس آتا قربانی و شانی کارکڑد آ مچ آ قوم اوفتے خراج تحسین پیش کیک۔ او پارے کہ سیکورٹی فورس آتا جیرت، کسبی چاہنداری و حکمت عملی دہشت گرد آتا ارادہ غاتے بے سہب کننگ نا پبی لائخی تخک، ملک آن دہشت گردی نا ناچوڑ نا پورو چٹفنگ اسکان سیکورٹی فورس آتا کارروائی پبی قومی مخ تفی و پورو واک اتون برجاسلک۔ او پارے کہ قوم ءِ بہادر سلہہ بند فوج آ گمر ءِ ہرا وطن نا دفاع کن مدام سنبرینگوک ءِ۔