جوانی اتنگ نا بابت کاریم تے برجاتخنگ کن سنبرینگوک اُن ،سینیٹر محمد اورنگزیب

اسلام آباد، بنجائی وزیر خزانہ و بنگکاری سینیٹر محمد اورنگزیب اصلاحات نا عمل ءِ برجاتخنگ نا بابت پاکستان نا اردگی نا درشانی ءِ کرسا پارینے کہ ایلو ملک اتٓتون شریداری ٹی کمک جاگہ غا واپارو زرکاری ءِ اولیت تننگ انگ ءِ، برجامالی سال انا وخت آ زرگزرانی ردوم کچ چار درسد یا اوکان زیات مننگ نا اومیت ءِ۔ او دا ہیت ءِ آئی ایم ایف و جہانی بینک انا سالانہ دیوان تا وخت آ بنکاک اٹی سٹی میکرو فورم نا دیوان اٹی بشخ ہلنگ و اسٹینڈرڈ چارٹرڈ نا وتواجہ زرکار آتا گول میز دیوان آن تران کرساپارے۔ وزیر خزانہ جہانی زرکار آتے پاکستان نا زرگزرانی منظرنامہ و اصلاحات نا بارواٹی اولیت آتا بارواٹی معلومدار کرے۔ او پارے کہ زرگزرانی سوگوی نا عمل اٹی پدریسہ پیشرفت برجاءِ، پدریسہ مسہ سال آ ن بنداوی مالیاتی سرپلس دوئی مننگ ءِ، مالیاتی نسخان 22 سال انا کم انگا کہول آٹے و زرکوڑی تے سوگو کننگ کن گام گیج کننگ انگ ءِ، برجامالی سال اٹی زرگزرانی ردوم کچ چار درسد یا اوکان زیات مننگ نا اومیت ءِ۔ وزیر خزانہ پاکستان نا جہانی کیپٹل مارکیٹ آتا بابت حکمت عملی ءِ بیان کرسا پانڈا بانڈز، سکوک و روپئی ٹی مالیت ولے ڈالر اٹی تنگن والا جہانی بانڈ انا جاری کننگ نا ڈٹ آتا ذکر ءِ کرسا پارے کہ مالی وسیلہ غاتا کمک اٹ وڑپہ پڑی‘ وام ہلنگ نا خڑچ کم کننگ و وام تا تننگ نا مد ءِ ودفنگ کن گام گیج کننگ انگ ءِ۔ او پارے کہ آئی ایم ایف پروگرام نا رداٹ پیشرفت، خراج نیٹ اٹی ودکی، کانود آ گچین عملدرآمد و مالیاتی نظم و ضبط ءِ برجا تخنگ کن صوبہ غاتتون گچین رابطہ کاری مننگ ءِ۔ نیامی دے ٹک نا جھیڑہ غاتا زہم تیا ہیت کرسا وزیر خزانہ توانائی نا فراوانی ءِ برجا تخنگ و ساڑی بجٹ جتا زر آتے ٹی سلسا نزور تپہ غاتے ہدفی ریلیف فراوان کننگ نا گام گیج آتے بیان کرے۔ دیوان اٹی موسمیاتی بدلی تا زہم تتون مون تننگ نا لائخی، آفت اتٓتون مون تننگ نا تیاری و شونداری مالی کمکاری نا گچین کاریم اٹ اتنگ آ ہم گپ وتران مس۔ وزیر خزانہ پدریسہ اصلاحات کن پاکستان نا ارادگی نا درشانی ءِ کرے و ایلو ملک آتتون شریداری ٹی کمک آن واپار و زرکاری نا کنڈ آ گدریفنگ نا اہمیت آ ہیت کرے۔