ادبی و ربیدگی سرجز آک راج اسے نا مثبت قدر آک مریرہ،ایڈیشنل کمشنر رخشان ڈویژن

خاران، نصیر کبدانی لبزانکی دیوان خاران نا ڈَل ایڈیشنل کمشنر رخشان ڈویژن ظفر گویا تون اونا دفتر اٹی اوڑدہی کرے۔ اوڑدہی نا بنداوی مسخت ایڈیشنل کمشنر رخشان ڈویژن ءِ خاران اٹی تعیناتی آ مبارکبادی پیش کننگ و علاقہ ٹی ادبی و علمی چاگڑد ءِ پین فعال کننگ کن گپ وتران کننگ ئس۔ ڈَل نا کماشی ءِ جنرل سیکرٹری شکور زاہد کرے وخت اس کہ ایلو باسک آتیٹی نائب صدر سفر خان راسکوئی، قیوم سادگ، حبیب دانش، جلال فراق، محمد عیسیٰ محمدحسنی، شہزاد سلیم، محمود پیرک و نجیب بلوچ اوار ئسر۔ اوڑدہی نا وخت آ ڈَل انا باسک آک دا اومیت نا درشانی ءِ کریر کہ ایڈیشنل کمشنر رخشان ڈویژن ظفر گویا نا ایڈیشنل کمشنر رخشان ڈویژن تعیناتی خاران اٹی علم و ادب، زبان و ربیدگ نا شون تننگ کن اسہ پوسکن ءُ تحریک اس مریک و ادیب، شاعر و کالم نگار تا است بڈی کن حکومتی کہول آ مثبت گام گیج کننگل۔ ڈَل ایڈیشنل کمشنر رخشان ڈویژن ءِ نصیر کبدانی لبزانکی دیوان اکیڈمی خاران نا دورہ کننگ نا باقاعدہ سلہ ہم خلک تاکہ او اکیڈمی نا سرجز و ہندی کہول آ زبان و ادب نا پیشرفت نا تینٹ جاچ ءِ ہلنگ کے۔ ایڈیشنل کمشنر رخشان ڈویژن ظفر گویا ڈَل انا بننگ و نیک استخواہی آ منتواری ءِ ہرفسا پارے کہ ادبی و ربیدگی سرجز آک راج اسے نا مثبت قدر آتا امین مریرہ و ہندی زبان و ادب نا شون تننگ کن وس انا کچ آ کمکاری فراوان کننگک۔ اوڑدہی ٹی نصیر کبدانی لبزانکی دیوان نا کنڈ آن شینک کروک آب اٹنگا کتاب آتا اسہ سیٹ اس ایڈیشنل کمشنر رخشان ڈویژن ظفر گویا ءِ پیش کننگا۔(رپورٹ محمد عیسیٰ محمد حسنی)