بنجائی وزیرِ ریلوائی ءِ رحمان بابا ایکسپریس شکست نا بنائی رپورٹ پیش
Get real time updates directly on you device, subscribe now.
اسلام آباد/ملتان، پاکستان ریلوائی نا تیکنکی ٹیم ملتان نا خڑک رحمان بابا ایکسپریس شکست نا بنائی جاست وپاستی رپورٹ ءِ بنجائی وزیرِ ریلوائی ءِ پیش کرے۔ بنائی جاست وپاستی رپورٹ نا رداٹ ٹرین ءِ شکست تکنیکی و مکینیکل خرابی نا سوب آن پیش بس۔ رپورٹ اٹی پاننگانے کہ ٹرین نا لگیج کوچ انا سائیڈ ہینگر اناگت پِناسس، ہرا ریلوائی ٹریک نا ٹرن آؤٹ کراسنگ اٹی بھاز بے وڑ اختہ مس۔ کراسنگ اٹی ہینگر اختہ مننگ نا سوب آن اول بوگی پٹڑی آن پیشن بس و رفتار نا زور انا سوب آن ٹرین نا کل 15 بوگیک پٹری آن شیف دڑنگار۔ ریلوائی کمامدارآتا ردا ٹ تکنیکی ٹیم شکست نا جاگہ نا سرجمی اٹ دورہ ءِ کننگ آن پد ہموکان پنوک آ سائیڈ ہینگر ءِ دوئی کرسا کوزہ ٹی ہلکنے، ہرادے باقاعدہ فرانزک و ٹیکنیکل جاچ پڑتال کن دوئی کننگانے‘ یات سلے کہ کراچی آن ملتان نا کسر اٹ پشاور آ ہنوک آ رحمان بابا ایکسپریس ءِ تدوک آ دے ملتان نا خڑک شیر شاہ نا ہند آ خوفناک شکست پیش بسوسس، ہراٹی چندی مسافر زوال و ٹھپی مسوسر۔ رپورٹ ملنگ آن پد بنجائی وزیرِ ریلوائی واقعہ نا کل سوب آتاخوڑتی اٹ جاچ ءِ ہلنگ و زموار آتے پک کرسا سخت محکمانہ کارروائی نا پارت کرے۔