مذاکرات نا بے سہبی نا زموار وزیر اعلیٰ کے پی کے سہیل آفریدی ءِ ،محسن نقوی

لاہور، بنجائی وزیر داخلہ محسن نقوی حکومت و تحریک انصاف نا نیام اٹی مذاکرات اٹی ودی مروک آ ڈیڈ لاک کن وزیراعلیٰ خیبرپختونخوا سہیل آفریدی ءِ زموار قرار ترسا پارینے کہ حکومت مذاکرات ءِ سرسہب جوڑ کننگ کن سنجیدہ ءُ کوشست اس کرے، ولے گڈیکو ریسہ ٹی باندات آتا بدل مننگ آن ہیت و گپ نا عمل مستی ہننگ کتو، قذافی اسٹیڈیم لاہور اٹی پریس کانفرنس کرسا محسن نقوی پارے کہ وزیراعظم شہباز شریف تون سرجم اوڑدہی مسنے وخت اس کہ صدرِ مملکت آصف علی زرداری و وزیراعظم ہڑتوم آتے مذاکرات تون اوار کل معاملہ غاتیٹی پورو بریفنگ تننگانے، وزیرِ داخلہ نا رِد اٹ حکومت است انا سِخت اٹ مذاکرات کرے، ولے اونا پاننگ نا رِد اٹ تحریکِ انصاف نا کنڈ آن خاص وڑ اٹ وزیراعلیٰ خیبرپختونخوا مذاکراتی عمل اٹی اڑاند ودی کرے، او دعویٰ کرے کہ وخت اس باندات آ اسُل پک مننگ آ سر مسوسر، تو گڈیکو ریسہ ٹی معاہدہ غا دستخط کننگ آن نمن کننگا، محسن نقوی پارے کہ مذاکرات نا نیام اٹی کساس 12 گھنٹہ اسکان پدریسہ سلابت برجا سلیس، و معاہدہ نا مسودہ چار وار پک دروشم آن پد دوارہ بدل مس، اونا رِد اٹ اسہ ہند اسے آ کساس 99 درسد باندات آتیٹی امنا مسوسس، ولے وزیراعلیٰ خیبرپختونخوا نا کنڈ آن ودیک بدلی نا خواست مون آ بس، او پارے کہ اگہ پک فیصلہ غاتے وزیراعلیٰ خیبرپختونخوا نا جند ءِ کروئی ئس تو اونا جند ءِ مذاکراتی عمل نا بشخ مروئی ئس، محسن نقوی نا رِد اٹ او مذاکرات نا نیام اٹی دا سلاہ ہم تسوسس کہ سہیل آفریدی یا اونا اسہ نمائندہ اس دراست ہیت و گپ اٹی اوار مرے، وزیرِ داخلہ پاش کرے کہ حکومت نا چکار سیاسی باندات آتیان زیات خیبرپختونخوا اٹی دہشت گردی نا ویل آٹے، اونا رِد اٹ مذاکرات اٹی پولیس آن تعلقدار کانود، اوغان شاری، مسکوہی قبائلی ضلع، قومی ایکشن پلان و کالعدم تحریک طالبان پاکستان تون اوار سیکورٹی آن تعلقدار چندی باندات آتیا شرہ مس، او پارے کہ مذاکرات اٹی لانگ مارچ نا باندات آ حکومت نا کنڈ آن ہچ ءُ ہیت اس کننگ تویسس، ولے پیپلز پارٹی نا کنڈ آن لانگ مارچ ءِ پد بٹنگ نا سلاہ مذاکراتی عمل نا بشخ اس ئس، محسن نقوی نا پاننگ ئس کہ اگہ مست آن سما مسکہ کہ خیبرپختونخوا حکومت مذاکراتی کمیٹی نا فیصلہ غاتے مسترد کیک تو داخس مرغن مذاکراتی عمل بنا ہم کننگتوکہ، او خیبرپختونخوا نا سیکورٹی حالیت آ گڑتی نا درشانی ءِ کرسا پارے کہ اسہ کنڈ آ صوبہ ٹی دہشت گردی نا گڑتی ءِ تو ارٹمیکو کنڈ آ صوبائی حکومت نا منہ بیان بنجائی ادارہ و فوج آن تعلقدار مون آ بننگ اٹی ءُ، اونا پاننگ نا رِد اٹ ساڑی حالیت آتیٹی کل آن اہم اولیت صوبہ ٹی دہشت گردی نا مون ءِ توننگ ءِ، وزیرِ داخلہ دعویٰ کرے کہ وخت اس مذاکراتی ڈل وزیراعلیٰ خیبرپختونخوا تون سلابت کن ایلو کمرہ ٹی ہناکہ تو پک مروک باندات آتیٹی بدلی بسکہ۔