بلوچستان نا آخبت ٹہیفوک آک کتاب ہرفوک آ ورناک ءُ،وزیر اعلیٰ میر سرفراز بگٹی

کوئٹہ، حکومتِ بلوچستان ایجوکیشن انڈومنٹ فنڈ نا رد اٹ مچ آ دنیا نا 100 آن زیات پنی آ یونیورسٹی تیٹی پی ایچ ڈی اسکالرشپس پروگرام کن برجا سال امیتدار آتیان درخواست نا پاننگانے، پروگرام نا رد اٹ بلوچستان نا لائخ آ ورناتے پنی آ جہانی یونیورسٹی تیٹی بڑزکو کہولی تعلیم و تحقیق نا وارخواہیک فراوان کننگور، حکومتِ بلوچستان نا اعلامیہ نا رِد اٹ ہر سال صوبہ غان 10 لائخ امیتدار پیشن ملک انا پنی آ یونیورسٹی تیٹی پی ایچ ڈی نا تعلیم کن اسکالرشپس فراوان کننگ نا ریسہ بنا کننگانے، گام انا مسخت ورنا تے بڑزکو کہولی تعلیم، تحقیق و پوسکنوڑ علمی وارخواہی اسکان رسینگ گیگ فراوان کننگ و اوفتے جہانی کہول آ گو تیٹی بشخ ہلنگ کن تیار کننگ ءِ۔ بلوچستان ایجوکیشن انڈومنٹ فنڈ انا چیف ایگزیکٹو آفیسر خالد ماندائی نا رِد اٹ تدوک آ سال بلوچستان نا 6 لائخ ءُ امیتدار چندی ملک آتا پنی آ یونیورسٹی تیٹی پی ایچ ڈی اسکالرشپ دوئی کرسا بڑزکو کہولی تعلیم کن ہنانو، دا اسکالر آتیٹی کوئٹہ نا فرزانہ انور ءِ برطانیہ نا یونیورسٹی آف لیڈز اٹی مالیکیولر اینڈ سیل بائیولوجی، بارکھان نا اکبر جان ءِ ڈنمارک نا یونیورسٹی آف کوپن ہیگن اٹی فوڈ سپلائیج اینڈ فوڈ سیفٹی، قلعہ سیف اللہ نا عمران خان ءِ کینیڈا نا یونیورسٹی آف البرٹا ٹی کشت و کشار و جنگلاتی حیاتیات، کوہلو نا حمیرا یونس ءِ آسٹریلیا نا یونیورسٹی آف کوئینزلینڈ اٹی سیاست و جہانی مطالعات، خاران نا ماہ نور سید ءِ برطانیہ نا یونیورسٹی آف برسٹل اٹی جینڈر مساوات وخت اس کہ قلات نا عبدالقاہر ءِ ملائیشیا نا یونیورسٹی ملایا ٹی ساختیات نا بشخ اٹی پی ایچ ڈی کن اسکالرشپ فراوان کننگا، وزیراعلیٰ بلوچستان میر سرفراز بگٹی جہانی کہول انا پی ایچ ڈی اسکالرشپ پروگرام نا بنا کننگ آ خوشی نا درشانی ءِ کرسا پارے کہ دا پروگرام بلوچستان نا روشنا آخبت نا مستائی ءِ، ورناتے دنیا نا گچین آ یونیورسٹی اسکان سر کننگ نا سفر بنا مسنے و دا اصل اٹ بلوچستان نا آخبت ءِ بدل کننگ نا سفر ءِ۔ وزیراعلیٰ پارے کہ بلوچستان نا ورناک وارخواہی تا پڑ آ دنیا غان پد سلپسہ، و دنیا نا گچین انگا یونیورسٹی تیا بلوچستان نا ورناک ہنور، دا بیرہ اسکالرشپ اس اف بلکہ بلوچستان نا بروک آ نسل آتیکن اومیت، علم و شونداری نا پوسکن ءُ کسر اسے۔