سیوتی حکومت تعلیم تون اوار ہر بشخ اکن گام گیج کننگ اٹی ءِ،یعقوب ناصر

کوئٹہ، پاکستان مسلم لیگ (ن) نا بنجائی سینئر نائب صدر و قومی اسمبلی ناباسک سردار یعقوب خان ناصر، صوبائی قائم مقام جنرل سیکرٹری و قومی اسمبلی نا باسک جمال شاہ کاکڑ، صوبائی وزیر تعلیم راحیلہ حمید خان درانی، قومی اسمبلی نا باسک اختر بی بی و ایم ایس ایف بلوچستان نا صوبائی صدر حیدر خان اچکزئی وایلو سرکڑدہ غاک پارینو کہ ننا جماعت سیوتی حکومت اٹی تعلیم تون اوار ایلو بشخ آتا گچینی کن گام گیج کننگ اٹی ءِ‘ اسہ جماعت اسے ہم کارندہ غاک مخ انا وڑ اٹ مریرہ‘ کارندہ غاتا ویل آتا ایسری کن صوبائی رابطہ دفتر نا بنا 5 اکتوبر آ مریک، ہراٹی صوبائی وزیر تا ساڑی گری ءِ پک کننگک۔ دا خیال آتا درشانی ءِ او پاکستان مسلم لیگ (ن) اسٹوڈنٹس فیڈریشن نا کنڈآن اڈ تروک ضلعی کانفرنس نا شریدار آتیان تران کرسا کریر۔ داوخت آ ترجمان شاکر محمدحسنی، نثار خان اچکزئی، ہمایوں خان کاکڑ، ذیشان خان کاکڑ، صدام خان اچکزئی و ایلوفک ہم ساڑی ئسر۔ ترانکار آک پاریر کہ پارٹی نا متکن آ سنگت و کارندہ غاک مدام سخت وخت اٹی پارٹی نا کمک ءِ کرینو و تینا سرکڑدہ غاتتون سلیسنو۔ ہمو کارندہ غاک پارٹی نا نہادی میرات ءُ، دا وڑا نا کارندہ غاتا است بڈی و اوفتا ویل آتا ایسری ننا زمواری ءِ‘ دا سوب آن پارٹی ءِ سوگو و بنجائی‘ صوبائی و ضلعی کہول آ کارندہ تا نیام اٹی رابطہ غاتے سوگو و بھرمی جوڑ کننگ کن گام گیج کننگ انگ ءِ تاکہ مر انگا علاقہ تا کارندہ و ضلع غات نمائندہ غاتے پارٹی سرکڑدہ غاتسکان دراست رسینگ گیگ دوئی مرے‘ ترانکار آک پاریر کہ پارٹی کارندہ غاتا خواری و قربانی تے گوجالنگپک و تنظیمی باندات آتیتی کارندہ غاتا سلاہ ءِ اہمیت تننگک تاکہ ورناک تنظیمی سرجز آتیٹی بشخ ہلیر‘ دا وخت آ بنجا و بلوچستان اٹی سیوتی حکومت آن بیدس پارٹی قائد میاں نواز شریف نا کماشی ٹی میاں شہباز شریف وزیراعظم و مریم نواز پنجاب نا وزیراعلیٰ نا وڑ اٹ کاریم کننگ اٹی ءُ، ترانکار آک پاریر کہ میاں محمد نواز شریف مارشل لا نا دور اٹی ہم سیاسی جہد ءِ برجا تخا، ہندا سوب ءِ کہ اینو ہم ملک انا الس میاں نواز شریف نا نظریہ و پالیسی ءِ دوست تورک۔