ورناک بلوچستان نا نہادی میرات و روشنا آخبت ءُ،بلال کاکڑ

کوئٹہ، بلوچستان سرمایہ کاری بورڈ انا وائس چیئرمین بلال خان کاکڑ پارینے کہ بلوچستان نا ورناک صوبہ نا نہادی میرات و روشنا آخبت نا ضمانت ءُ، اوفتا راہشونی‘ تعلیم و ہیلکاری‘ کسبی لائخی تے ٹی ودکی و اوفتے روزگار و کاروبار نا گچین وارخواہی تا فراوانی حکومت بلوچستان نا اہم اولیتی گام گیج آتیٹی اوار ءِ‘ اسہ بیان اسے ٹی او پارے کہ حکومت بلوچستان ورناتے پوسکنوڑ دور انا خواست آتتون ہمگرنچ کننگ و اوفتے شرف اٹ روزگار نا لائخ جوڑ کننگ کن جتا بشخ آتیٹی گام گیج کننگ انگ ءِ‘ وزیراعلیٰ بلوچستان میر سرفراز بگٹی نا کماشی ٹی ورناتا شون، ہنرمندی نا شون تننگ و اوفتے زرگزرانی سرجز آتا فعال بشخ جوڑ کننگ کن جتا جتا پروگرام و گام گیج آتیا کاریم برجا ءِ۔ بلال خان کاکڑ پارے کہ ساڑی دور اٹی ورناتا سرسہبی کن بیرہ روایتی تعلیم بھاز اف اف بلکہ اوفتے پوسکنوڑ ٹیکنالوجی، ڈیجیٹل چاہنداری‘ کاروباری لائخی‘ فری لانسنگ، انٹرپرینیورشپ و مارکیٹ نا گرج آتا رِد اٹ کسبی ہیلکاری فراوان کننگ ہم المی ءِ۔ حکومت بلوچستان ہندا گرج ءِ مون آ تخسا ورناتیکن ہندن ءُ وارخواہی ودی کننگ آ چکار کننگ نا کمک اٹ او بیرہ ہندی کہول آ بلکہ قومی و جہانی مارکیٹ اٹی ہم تینا لائخی تے کاریم اٹ اتنگ کیر‘ او پارے کہ ورناتے بیرہ روزگار نا دوئی کننگ اسکان کچ اٹ تخنگ نا جاگہ غا اوفتے روزگار ودی کروک بندغ و سرسہب کاروباری بندغ جوڑ کننگ نا کنڈ آ دننگ وخت انا اہم ءُ گرج اسے۔ حکومت، پرائیویٹ بشخ، تعلیمی ادارہ و زرکاری تون تعلقدار ادارہ تا نیام اٹی حوال آتا کمک اٹ ورناتیکن پین وارخواہی ودی کننگ مننگ کیک۔