اقوام متحدہ ٹی پاکستان نا آخبتی مندوب نا سیکرٹری جنرل تون سفاروکی اوڑدہی
Get real time updates directly on you device, subscribe now.
اقوام متحدہ، اقوام متحدہ ٹی پاکستان نا آخبتی مندوب عاصم افتخار احمد اقوام متحدہ نا سیکرٹری جنرل انتونیو گوتریش تون سپاروکی اوڑدہی کرے۔ سیکرٹری جنرل جہانی ادارہ و اونا امن و شونداری نا ایجنڈا کن پاکستان نا کماشی نا کڑد و پبی کمک نا ستاءِ کرے۔ او پاکستان نا ثالثی نا کوشست و اقوام متحدہ نا سلامتی کونسل نا ساڑی باسک انا حیثیت اٹ اونا کڑد انا ہم ستاءِ کرے۔ اقوام متحدہ ٹی پاکستانی مشن نا کنڈ آن جاری پریس ریلیز نا رداٹ انتونیو گوتریش سفیر عاصم افتخار احمد ءِ پاکستان نا پوسکن آ سیکرٹری خارجہ گچین مننگ آ مبارکبادی تس و اوڑکن نیک است خواہی نا درشانی ءِ کرے۔ سفیر عاصم افتخار احمد تینا سفارتی دور انا وخت آ سیکرٹری جنرل و اونا ٹیم انا کنڈ آن تننگوک آ کمک آ منت واری نا درشانی ءِ کرے و کثیرالجہتی نظام، اقوام متحدہ نا منشور و جہانی کانود کن اونا کماشی و اصولی مخ تفی نا ستاءِ کرے۔ عاصم افتخار احمد اپریل 2025 آن اقوام متحدہ ٹی پاکستان نا چیف ڈیلیگیٹ نا حیثیت اٹ خذمت سرتس۔ او اقوام متحدہ نا سلامتی کونسل اٹی پاکستان نا رکنیت نا وخت آ ہم ملک انا نمائندگی ءِ کرے و جولائی 2025 اٹی سلامتی کونسل نا صدر نا حیثیت اٹ فرض سرتس۔ داکان مست او 2022 آن 2024 اسکان فرانس و 2017 آن 2021 اسکان تھائی لینڈ اٹی پاکستان نا سفیر و وزارت خارجہ نا ترجمان ہم رہینگانے۔