پی سی بی ٹیلنٹ ہنٹ پروگرام ورنا گوازی گر تیکن اہم ءُ پلیٹ فارم اسے، یاسر اقبال دشتی

تربت، پاکستان کرکٹ بورڈ (پی سی بی) نا ٹیلنٹ ہنٹ پروگرام نا رد اٹ ضلع کیچ اٹی انٹر اسکولز کرکٹ ٹورنامنٹ نا باقاعدہ بناءِ کننگا۔ بنائی دود انا خاص انگا مہمان ڈپٹی کمشنر کیچ یاسر اقبال دشتی ئس۔ دود اٹ پی سی بی کوئٹہ ریجن نا صدر و ٹورنامنٹ نا سرپرستِ اعلیٰ شہ دوست دشتی، ڈسٹرکٹ ایجوکیشن آفیسر کیچ امجد شہزاد، ڈسٹرکٹ کرکٹ ایسوسی ایشن کیچ نا مسکوہی صدر عبدالرحیم بلوچ، اسپورٹس آفیسر کیچ غفار یوسف، اسپورٹس افسر تمپ حبیب مراد، آل مکران تاجر اتحاد نا صدر اسحاق روشن دشتی، انجمن تاجران کیچ نا چیئرمین غلام اعظم دشتی، جمال مری تون اوار سیاسی، راجی‘ تعلیمی و گوازی تتون تعلقدار شخصیت آک بشخ ہلکر۔ ٹورنامنٹ نا بنائی میچ ڈیلٹا اسکول تربت و کیچ گرائمر اسکول نا نیام اٹی مس‘ ہراٹی گوازی گرک گچین گوازی کریر۔ داوخت آ گوازی گر، استاد و منتظم آتے ٹی بھلو جوش جوزہ اٹ خننگاکہ۔ داوخت آ ڈپٹی کمشنر کیچ یاسر اقبال دشتی پارے کہ ورناتے ٹی ساڑی گوازی تا ٹیلنٹ ءِ پٹسا اوٹی گچینی اتنگ و جوان وارخواہی فراوان کننگ نا گرج ءِ۔ پی سی بی ٹیلنٹ ہنٹ پروگرام اسکول کہول انا ورنا گوازی گر تیکن تینا لائخی تے نشان تننگ کن اہم ءُ پلیٹ فارم اسے۔ او کیچ اٹی کرکٹ نا شون تننگ کن پی سی بی کوئٹہ ریجن نا صدر شہ دوست دشتی و منتظم آتا کوشست آتا ستاءِ کرے وپارے کہ ضلعی انتظامیہ ورناتے گوازی تیکن گچین چاگڑد و آسراتی تا فراوانی کن دوئی وسیلہ غاتے کاریم اٹ اتنگ اٹی ءِ۔ ڈسٹرکٹ ایجوکیشن آفیسر کیچ امجد شہزاد پارے کہ اسکول آتیٹی گوازی تا سرجز آتا شون تننگ آن طالب علم آتے ٹی نظم و ضبط، ٹیم ورک و جانجوڑ گو تا جوزہ ودی مریک۔