اکنامک فورم یا سیمینار اٹی پوسکن آ صوبہ غاتا بابت شرہ سرسہب مفک‘ پارلیمنٹ اٹی شرہ غان فائدہ مریک‘ رانا ثناء اللہ

لاہور، وزیراعظم نا سیاسی باندات نا سلاہکار رانا ثناء اللہ پارینے کہ اکنامک فورم یا سیمینار اٹی صوبہ غاتا بابت شرہ سرسہب مفک‘ صوبہ غاتتون تعلقدار شرہ پارلیمنٹ اٹی مریک۔ لاہور اٹی پریس کانفرنس آن تران کرسا رانا ثناء اللہ پارے کہ اگہ الس پوسکن صوبہ خواہک تو اوفتے کس اس توننگ کپک، الس نا خواست انا باندات پارلیمنٹ اٹی مریک۔ وزیرِ داخلہ نا پوسکن آ صوبہ غاتتون گنڈوک بیان نا بابت سوج آ رانا ثناء اللہ پارے کہ اکنامک فورم یا سیمینار اٹی صوبہ غاتا شرہ نا فائدہ مفک‘ صوبہ غاتتون گنڈوک باندات آ شرہ پارلیمنٹ اٹی بھرمی مننگ کیک‘ بنجائی وزیر داسکان پارلیمنٹ یا کابینہ ٹی دا ہیت ءِ کتنے، پوسکن آ صوبہ غاتے جوڑ کننگ نا باندات داسکان کابینہ ٹی بتنے‘ پارلیمنٹ نا اسیجائی دیوان اگہ منظوری تس تو ریفرنڈم مریک۔ او پارے کہ وزیرِ داخلہ نا تران، بیان و فورم آتیا ہیت کننگ آن ہچ ءُ جوانی اس بتنے، دا ہیت پارلیمنٹ اٹی مروئی ئس، ہراتم دا شرہ پارلیمنٹ اٹی بریک تو کل پارٹیک تینا موقف ءِ ایترہ۔پوسکن آ صوبہ غاتا بابت ن لیگ نا موقف آ ہیت و گپ برجا ءِ‘ ن لیگ شرہ ٹی بشخ ہم ہلکیک، وزیراعظم داڑان تران کیک۔