پاک چین سفارتی تعلقداری نا 75می سال دے، چینگدو ٹی دود

چینگدو، پاک چین سفارتی تعلقداری تا 75می سال دے آ چین نا شار چینگدو ٹی بخیری دود اڈ تننگا۔ ہرانا بست وبند ءِ قونصل جنرل پاکستان چینگدو نا کنڈ آن وانڈا ریگن چینگدو ٹی کننگا۔ دود انا مہمانداری ءِ قونصل جنرل پاکستان چینگدو تنویر اے بھٹی کرے۔ دود اٹ سچوان پیپلز کانگریس قائمہ کمیٹی نا نائب چیئرمین ہی یان ژینگ و سچوان دفتر خارجہ نا ڈائریکٹر جنرل ژانگ تاؤ خاص انگا مہمان نا وڑ اٹ بشخ ہلکر۔ چینگدو ٹی تعینات جتا جتا ملک آتا قونصلر نمائندہ غاک، سچوان آن تعلقدار چندی بشخ آتا اہم شخصیت آک و سویلی دیکی چین اٹی ہنکینی پاکستانی برادری ہم دود اٹ بشخ ہلک۔ دود آن چین اٹی پاکستان نا سفیر خلیل ہاشمی نا ویڈیو کلہو ءِ بنفنگا۔ تینا کلہو اٹی خلیل ہاشمی پارے کہ ربیدہ سنگتی نا زندہ شاہدی ءِ وخت اس کہ ازم الس نا نیام اٹی خڑک تعلقاتداری تا عملی درشانی ءِ۔