بینک و مالیاتی ادارہ غاک کشارگر، ایس ایم ای و ہاؤسنگ سیکٹر ءِ وام ایتر،وزیر اعظم شہباز شریف

وزیراعظم محمد شہباز شریف بزغرآتے اڑاند آن بیدس و آسان شڑت آتیا مالی وسیلہ غاتسکان رسینگ ءِ پک جوڑ کننگ نا پارت کرسا پارینے کہ بینک و مالیاتی ادارہ غاک بزغر، ایس ایم ایز و ہاؤسنگ سیکٹر ءِ وام تا فراوانی ٹی تینا کڑد ءِ ادا کیر۔ چارشنبے نا دے آ پی ایم آفس نا میڈیا ونگ آن جاری بیان نا رداٹ وزیراعظم محمد شہباز شریف نا کماشی ٹی مالیات اسکان رسینگ نا ڈٹ 2026-2028 نا بابت دیوان اس اڈ ہلک ہراٹی وزیراعظم اپنا گھر اسکیم، کشت و کشار و ایس ایم ایز نا بشخ آتا شونداری کن فنانسنگ آ پیشرفت نا بابت برجا گام گیج آتا جاچ ءِ ہلنگا۔ وزیراعظم محمد شہباز شریف پارے کہ بینک و مالیاتی ادارہ غاک بزغر، ایس ایم ایز و ہاؤسنگ سیکٹر ءِ وام تا فراوانی ٹی تینا کڑد ءِ ادا کیر، ہرا بینک وام تا فراوانی ٹی پبی کڑد ادا کیک حکومت اونا است بڈی ءِ کیک۔ او پارے کہ کشاری بشخ ملک انا زرگزران اٹی تمبہ نا حیثیت تخک ہرانا مون آ دننگ کن کاریم کننگ راجی زمواری ءِ۔ وزیراعظم بزغرآتے اڑاند آن بیدس و آسان شڑت آتیا مالی وسیلہ غاتسکان رسینگ ءِ المی جوڑ کننگ نا پارت کرے۔ او پارے کہ کم کٹیاو نیامی تپہ غاتے کن اڑزان ہاؤسنگ نا فراوانی ننا اولیت ءِ، صوبائی چیف سیکرٹریک ہمو ملکیت آتا جم سروے ءِ کرفر ہرافتے کن بینک تینا اُرانا خواہندار بندغ آتے ”وزیراعظم اپنا گھر اسکیم” نا رداٹ وام تننگ کیر۔ دیوان ءِ ہاؤسنگ، کشت و کشار و ایس ایم ایز نا بشخ آتا فنانسنگ نا بابت گام گیج آتیا حوال تننگا۔ حوال اٹی پاننگا کہ وزیراعظم اپنا گھر اسکیم نا بابت داتم سکان 14,504 درخواست دوئی مسنے ہرافتیان 53,127 منظور مسنے، دا اسکیم نا رداٹ منظور مروک آ درخواست آتا کل مالیت 313.42 ارب روپئی ءِ وخت اس کہ 8,739 درخواست تروک آتے 45.43 ارب روپئی نا وام تننگانے۔ مچ آ ملک اٹی مورگیج نا شڑت آتے پورو کروک آ پلاٹ آتا پیدواری کن سسٹم جوڑ کننگ انگ ءِ ہرانا پائلٹ اسلام آباد آن مریک۔ اپنا گھر اسکیم ءِ پین گچین جوڑ کننگ کن پنی آ ہاؤس ڈویلپرز آتے دا عمل اٹی اوار کننگ کن گچین وڑوڈول اس جوڑ کننگک۔ کشاری بشخ اکن بینک آتا کنڈ آن وام تا کچ اگست 2026 اٹی 1.268 ٹریلین روپئی ئس وخت اس کہ ایکسیس ٹو فنانس پلان 2026-2028 نا رداٹ جون 2028 اسکان 2 ٹریلین روپئی نا ہدف پک کننگانے۔ زرخیز (Zarkhez) ایپ نا کمک اٹ آسان وام تیکن 35,838 درخواست دوئی مس ہراڑکن 7.35 ارب روپئی منظور مس ہرافتے آن 1.96 ارب روپئی نا وام جاری کننگانے۔ اگست 2026 اسکان بینک آتا کنڈ آن ایس ایم ای نا بشخ آتے وام تا کچ 1.067 ٹریلین روپئی ئس وخت اس کہ ایکسیس ٹو فنانس پلان 2026-2028 نا رداٹ جون 2028 اسکان دا وام تا ہدف 2 ٹریلین روپئی تخنگانے۔ حوال اٹی دا ہم پاننگا کہ سمیڈا گدرینگوک آ مسہ تُو اٹی 1096 ایس ایم ایز تے فائنانشل لٹریسی نا ہیلکاری تس۔ دیوان اٹی نائب وزیراعظم و وزیر خارجہ محمد اسحاق ڈار، بنجائی وزیر احد خان چیمہ، رانا تنویر حسین، محمد اورنگزیب، ریاض حسین پیرزادہ، وزیر مملکت بلال اظہر کیانی، سلاہکار وزیراعظم ہارون اختر خان، گورنر اسٹیٹ بینک جمیل احمد، ہر چار آ صوبہ و آزاد جموں وکشمیر و گلگت بلتستان نا چیف سیکرٹریک، IBRD نا کنٹری ڈائریکٹر بولورما امگابزر، پاکستان بینک آتا صدرک و سی ای اوک و تعلقدار بڑزکو سرکاری افسر آک بشخ ہلکر۔