بلوچستان ایوی ایشن کمپنی ءِ پوسکنوڑ خواست آتتون ہم گرنچ کننگے،وزیراعلیٰ میر سرفراز بگٹی

وزیراعلیٰ بلوچستان میر سرفراز بگٹی چارشنبے نا دے بلوچستان ایوی ایشن کمپنی نا بورڈ آف ڈائریکٹرز نا چارمیکو دیوان نا کماشی ءِ کرے، ہراٹی کمپنی تون تعلقدار اہم انتظامی، مالی و آپریشنل باندات آتا جاچ ءِ ہلسا کیہی اہم فیصلہ و سلاہ و مسکوہی بورڈ دیوان نا فیصلہ غاتا پک کننگ نا منظوری تننگا۔ دیوان اٹی بلوچستان ایوی ایشن کمپنی نا کارکڑد‘ انتظامی باندات‘ آپریشنل باندات و بروک آ لائحہ عمل آ جم سجفنگا۔ دا وخت آ کمپنی نا باندات آتے پین بھرمی و منظم جوڑ کننگ، آپریشنل واکداری ٹی ودکی و ادارہ نا کارکڑد ءِ گچین کننگ تون تعلقدار چندی باندات آتیا شرہ کننگا۔ وزیراعلیٰ میر سرفراز بگٹی پارت کرے کہ بلوچستان ایوی ایشن کمپنی ءِ پوسکنوڑ خواست آتتون ہم گرنچ کرسا اونا آپریشنل و انتظامی لائخی تے ٹی پین گچینی اتنگے تاکہ ادارہ صوبہ ٹی فضائی آسراتی تا شون اکن جوان کڑد ادا کننگ کے۔ وزیراعلیٰ تعلقدار کمامدار آتے پارت کرے کہ کمپنی نا باندات آتیٹی شفافیت، کسبی نظم و نسق و چاروکی ءِ پک کننگے وخت اس کہ منظور کروک فیصلہ غاتیا وخت آ عملدرآمد کن صاف و شفاف وڑوڈول پیدوار کننگے۔ دیوان اٹی چیف سیکرٹری بلوچستان شکیل قادر خان، سیکرٹری خزانہ جہانگیر خان، ڈائریکٹر جنرل بلوچستان ایوی ایشن کمپنی کیپٹن علی آزاد تون اوار بلوچستان ایوی ایشن کمپنی نا بورڈ آف ڈائریکٹرز نا باسک و تعلقدار کمامدار آک بشخ ہلکر۔