سیکورٹی فورس آتا بلوچستان اٹ کارروائی، 11 دہشت گرد خلنگار،آئی ایس پی آر
6 و 7 ستمبر آ ضلع خاران و واشک اٹ بھارتی پراکسی فتنہ الہندوستان نا دہشت گرد آتا برخلاف کارروائی کننگا، ترجمان پاک فوج
Get real time updates directly on you device, subscribe now.
سیکورٹی فورس آک بلوچستان نا ضلع خاران و واشک اٹ بھارتی پراکسی فتنہ الہندوستان نا دہشت گرد آتا برخلاف کارروائی تا وخت آ 11 دہشت گرد ءِ خلکر۔ چارشنبے نادے آپاک فوج انا شعبہ تعلقات عامہ (آئی ایس پی آر) نا بیان نا رداٹ سیکورٹی فورس آک 6 و 7 ستمبر 2026 آ بلوچستان نا ضلع خاران و واشک اٹ بھارتی پراکسی فتنہ الہندوستان تون تعلقدار دہشت گرد آتا ساڑی مننگ نا حوال آ انٹیلی جنس بیسڈ آپریشن کریر ہراٹی بھارتی کاٹم خواجہی ٹی کاریم کروک 11 دہشت گرد ءِ خلنگا۔ 6 ستمبر آ دہشت گرد آک خاران اٹ سڑک ءِ بند کرسا ہندی ٹریفک اٹ اڑاند شاغنگ نا کوشست کریر، سیکورٹی فورس آک وخت آ کارروائی کرسا دہشت گرد آتے توریر و گچین وڑ اٹ شست کریر ہراڑان بھارتی کاٹم خواجہی ٹی کاریم کروک 8 دہشت گرد خلنگار۔ 7 ستمبر آ اسہ پین کارروائی اسے ٹی ضلع واشک اٹ دہشت گرد آتا ساڑی مننگ نا حوال آ ڈٹ بندی نا رداٹ انٹیلی جنس بیسڈ آپریشن کننگا ہراٹی سیکورٹی فورس آک دہشت گرد آتا ہند آتے گچین وڑ اٹ بھس کریر، اسہ ایلو آ سم کاری آن پد 3 دہشت گرد خلنگار۔ داکان بیدس، سیکورٹی فورس آک 2.9 ٹن دھماکہ منچر ہم دوئی کریر ہرا دیسی جوڑ کروک دھماکہ خیز ازباب آتا تیاری کن کاریم اٹ اتنگاسر، علاقہ ٹی ساڑی بھارتی کاٹم خواجہی ٹی کاریم کروک ایلو دہشت گرد آتا چٹفنگ کن کلیئرنس و سینیٹائزیشن آپریشن برجاءِ۔ آئی ایس پی آر پارینے کہ بنجائی ایپکس کمیٹی نیشنل ایکشن پلان نا منظوری آن ”عزمِ استحکام“ نا وژن نا رداٹ سیکورٹی فورس و کانود نافذ کروک ادارہ غاتا کنڈآن ملک آن درملکی کاٹم خواجہی و مخ تف دہشت گردی نا ناچوڑ نا پورو چٹفنگ کن بے فرق و پدریسہ دہشت گردی تور مہم پورو ترندی اٹ برجاسلک۔وزیراعظم محمد شہباز شریف بلوچستان اٹی دہشت گرد آتا برخلاف سرسہب کارروائی آ سیکورٹی فورس آتے خراج تحسین پیش کرسا پارینے کہ بھارتی کاٹم خواجہی ٹی مروک دہشت گردی ءِ پورو چٹفنگک۔ چارشنبے نادے وزیراعظم آفس نا میڈیا ونگ آن جاری بیان اٹی وزیراعظم بھارتی کاٹم خواجہی ٹی کاریم کروک 11 دہشت گرد ءِ خلنگ آ سیکورٹی فورس آتا وخت آ و گچین کارروائی نا ستاءِ کرے۔ وزیراعظم خاران اٹی سڑک ءِ بند کرسا ہن و بر ءِ زہمی کننگ نا کوشست ءِ بے سہب جوڑ کننگ، واشک اٹی دہشت گرد آتا ہند ءِ بھس کننگ و 2.9 ٹن منچر دوئی کننگ آ فورس آتا کسبی لائخی تا ستاءِ کرے۔ وزیراعظم شہباز شریف پارے کہ دہشت گرد و اوفتا کمک کروک آتا پراگندہ ارادہ غاتے اسُل سرسہب مننگ کن الیپنہ و بھارتی کاٹم خواجہی ٹی مروک دہشت گردی ءِ پورو چٹفنگک۔ او پارے کہ فتنہ الخوارج و ایلو دہشت گرد زموارآتا برخلاف کارروائی پورو واک اٹ برجا سلک۔ صدر مملکت آصف علی زرداری بلوچستان نا ضلع خاران و واشک اٹی بھارتی کاٹم خواجہی ٹی کاریم کروک دہشت گرد آتے خلنگ آ سیکورٹی فورس آتے خراج تحسین پیش کرینے۔ چارشنبے نادے آایوان صدر نا پریس ونگ انا رداٹ صدر مملکت واشک اٹی دہشت گرد آتا برخلاف کارروائی نا وخت آ 2.9 ٹن منچر دوئی کننگ آ سیکورٹی فورس آتے خراج تحسین پیش کرسا پارینے کہ بھارتی کاٹم خواجہی ٹی کاریم کروک دہشت گرد آتا ناپاک ارادہ غاتے امر کہ مرے بے سہب کننگک۔ او پارے کہ فتنۃ الہندوستان دہشت گرد آتا نیٹ ورک آتا پورو چٹفنگ اسکان کارروائی برجاسلک۔