فوجداری انصاف آب انا کسبی جاست وپاست تون گنڈوک ءِ،چیف جسٹس یحییٰ آفریدی

اسلام آباد، پاکستان نا چیف جسٹس جسٹس یحییٰ آفریدی پارینے کہ جاست وپاست و شاہدی مچ کننگ نا ریسہ غاتیٹی پولیس نا کارکڑد فوجداری انصاف نا آب آ دراست زہم تخک، کسبی جاست وپاست و آب اٹ شاہدی گچین و انصاف نا نظام فوجداری انصاف کن بنداوی اہمیت تخک۔ سپریم کورٹ نا شعبہ تعلقات عامہ نا جاری اعلامیہ نا رداٹ پاکستان نا چیف جسٹس تون کمانڈنٹ نیشنل پولیس اکیڈمی سعد اختر بھروانہ و ڈین نسٹ لاء اسکول محمد نواز واہلہ سپریم کورٹ اٹی اوڑدہی کریر۔ اوڑدہی نا وخت آ نیشنل پولیس اکیڈمی و فیڈرل جوڈیشل اکیڈمی نا نیام اٹ ادارہ ئی کمک نا اہمیت آ گپ و تران کننگا۔ کمانڈنٹ نیشنل پولیس اکیڈمی چیف جسٹس ءِ پولیس افسر آتا ہیلکاری پروگرام تیان معلومدار کرے۔ چیف جسٹس پارے کہ ہڑتوم آ ادارہ غاتا نیام اٹ کمک آن پولیس افسر آتا فوجداری کانود، جاست وپاستی وڑوڈول، شاہدی مچ کننگ و کیس آتا تیاری نا بارواٹی کچ ءِ گچین کننگ اٹی کمک رسینگک۔ او کسبی، کانود آن معلومدارو حق آتا شرف ءِ کروک پولیس افسر ہیلکاری ٹی نیشنل پولیس اکیڈمی نا کڑد انا ستاءِ کرے۔ اوڑدہی ٹی ڈین نسٹ لاء اسکول چیف جسٹس ءِ ادارہ نا کانودی تعلیم نا پروگرام تیان معلومدار کرے وخت اس کہ نسٹ لاء اسکول و فیڈرل جوڈیشل اکیڈمی نا نیام اٹ کمکاری نا سلاہ تیا ہم گپ وتران مس۔ چیف جسٹس پارے کہ پولیس آفیسر و کانود نا طالب علم آک انصاف نا فراوانی نا نظام نا اہم شریدار ءُ۔ آب اٹ کانودی تعلیم بار و اونا بھرم اٹ عدالتی نظام ءِ سوگو کننگ کن بنداوی اہمیت تخک۔ او آخبت نا لائخ و کسبی کانودی چاہندارآتا تیاری ٹی نسٹ لاء اسکول نا کڑد انا ستاءِ کرسا ہڑتوم آ ادارہ غاتا فیڈرل جوڈیشل اکیڈمی تون سلاہ ئی کمک نا ستاءِ کرے۔ چیف جسٹس کاریم نا کچ، ادارہ ئی ہیل کننگ و انصاف نا نظام ءِ سوگو کننگ کن اسیجائی گام گیج آتیٹی ہر وڑ انا کمکاری نا باوری ہم کرفے۔