پنجگور، رائز بلوچستان نا کمک اٹ ڈیجیٹل مارکیٹنگ نا کورس آتا بنا،یونیورسٹی آف مکران

پنجگور، حکومت بلوچستان نا RISE بلوچستان پروگرام نا رِد اٹ یونیورسٹی آف مکران پنجگور اٹی مار ومسڑ طالب علم آتے کن جتا جتا آئی ٹی کورس انا اورینٹیشن سیشن اڈ ہلک۔ دا پروگرام نا مسخت طالب علم آتے پوسکن آ دور انا خواست آتتون ہم گرنچ کننگ و اوفتے روزگار، فری لانسنگ، آن لائن کاروبار و ڈیجیٹل زرگزران نا پوسکن آ وارخواہی تیان درستی راستی کرفنگ ءِ۔ حکومت بلوچستان و RISE بلوچستان پروگرام نا کمکاری اٹ یونیورسٹی آف مکران اٹی ویب ڈویلپمنٹ، گرافکس ڈیزائننگ، ای کامرس و ڈیجیٹل مارکیٹنگ نا کورس آک بنا کننگانو۔ دا پروگرام نا رِد اٹ یونیورسٹی آف مکران نا جم وڑ اٹ 100 مار مسڑ طالب علم ءِ ہیلکاری فراوان کننگک۔ دا وخت آ وائس چانسلر یونیورسٹی آف مکران پروفیسر ڈاکٹر میر سادات بلوچ و RISE بلوچستان پروگرام نا کوآرڈینیٹر مجاہد علی بلوچ طالب علن آتیان تران کرسا پاریر کہ ساڑی دور اٹی تعلیم تون اوار پوسکن آ ٹیکنالوجی تون درستی راستی و عملی چاہنداری تا دوئی کننگ ہم المی مسنے۔ دنیا ترندی اٹ ڈیجیٹل زرگزران نا کنڈ آ ہننگ اٹی ءِ‘ ہراڑے ورنا تے کن روایتی روزگار تون اوار فری لانسنگ، آن لائن کاروبار و ڈیجیٹل سروسز نا نمان وارخواہی ساڑی ءُ۔ او پاریر کہ ورنا تے دُن انگا پوسکن و عملی چاہنداری تے ہیل کروئی ءِ ہرافک اوفتے آخبت اٹ روزگار و جندی روزگار نا گچین وارخواہی فراوان کیر۔ او طالب علم آتیا زور شاغار کہ او دا ہیلکاری پروگرام اٹی است خواہی‘ خواری و پدریسہ مشق انا کمک اٹ تینا لائخی تے گچین کیر و دوئی وارخواہی تیان فائدہ ہرفر۔ (تلار نیوز)