زمواری تا رد اٹ ڈیوالئی و غیر حاضری ءِ ہچ گہس سگپنہ،ڈپٹی کمشنر نصیرآباد

ڈپٹی کمشنر نصیرآباد وریندر لعل نا کماشی ٹی ڈسٹرکٹ ہیلتھ کمیٹی نا اہم ءُ دیوان اس اڈ ہلک ہراٹی ڈسٹرکٹ ہیلتھ آفیسر ڈاکٹر ایاز حسین جمالی، میڈیکل سپرنٹنڈنٹ ڈاکٹر حبیب اللہ پندرانی، ڈسٹرکٹ منیجر طارق شہباز تون اوار محکمہ جانجوڑی نا ایلو تعلقدار افسر و کمیٹی باسک آک بشخ ہلکر۔ دیوان نا وخت آ مچ آ ضلع ٹی الس ءِ فراوان کروک طبی آسراتی، سرکاری ہسپتال و جانجوڑی ہند آتیٹی ساڑی ویل، ڈاکٹر، نرسنگ اسٹاف و پیرامیڈیکل کارندہ غاتا حاضری، دارو تا فراوانی، سفائی و ناجوڑ آتے گچین طبی آسراتی تا فراوانی تون اوار جتا جتا اہم باندات آتا جم جاچ ءِ ہلنگا۔ ڈپٹی کمشنر وریندر لعل تعلقدار افسر آتے پارت کرے کہ ضلع نا کل سرکاری ہسپتال و بنداوی جانجوڑی ہند آتیٹی ڈاکٹر، پیرامیڈیکل اسٹاف و ایلو کارندہ غاتا وخت آ حاضری ءِ امر کہ مرے پک کننگے تاکہ مُر انگا علاقہ غاتیان بروک ناجوڑ آتے ہچ ءُ وڑ اسے نا خواری تون مون تروئی تمپ۔ او پیدوار کرے کہ زمواری تا رد اٹ ڈیوالئی و غیر حاضری ءِ ہچ ءُ وڑ اسے ٹی سگنگ مفک و غیر حاضر ملازم آتا برخلاف قاعدہ نا رِد اٹ کارروائی کننگک وخت اس کہ غیر حاضری کننگ آ قاعدہ و ضابطہ نا رِد اٹ تنخواہ تیان کٹوتی ہم کننگک۔ او پارے کہ الس ءِ جانجوڑی نا آسراتی تا فراوانی حکومت نا اولیکو اولیت آتیٹی اوار ءِ۔ و الس ءِ اوفتا درگہ غا آب اٹو طبی آسراتی تا فراوانی کن کل دوئی وسیلہ غاتے کاریم اٹ اتنگے۔ ہسپتال آتیٹی بروک ناجوڑ و اوفتا خاہوت آتتون جوان وڑ اٹ پیش برسا ناجوڑ آتے وخت آ طبی جاچ والمی درمان فراوان کننگ تون اوار دارو تا ساڑی گری ءِ ہم پک کننگے۔ ڈپٹی کمشنر محکمہ جانجوڑی نا افسر آتے پارت کرے کہ او مچ آ ضلع نا ہسپتال و جانجوڑی ہند آتا باقاعدگی اٹ دورہ ءِ کیر، طبی آسراتی و کارندہ غاتا کارکڑدنا چاروکی ءِ کیر و مون تروک ویل آتے معلوم کرسا اوفتا دمدستی ایسری کن عملی گام گیج کیر۔ او پارے کہ جانجوڑی نا بشخ اٹی جوانی کن چاروکی نا نظام ءِ پین بھرمی جوڑ کننگے و السی غاو تا دمدستی ایسری ءِ پک کننگے۔ دیوان اٹی ضلع نا ہسپتال آتیٹی طبی آسراتی تا جوانی، دوئی وسیلہ غاتا بھرمی کاریم اٹ اتنگ، کارندہ غاتا کارکڑد و ایلو انتظامی باندات آتا ہم جاچ ہلنگا وخت اس کہ تعلقدار افسر آک جانجوڑی نا بشخ اٹی برجا گام گیج و مون تروک ویل آتا بابت ڈپٹی کمشنر ءِ بریفنگ تسر۔