10 ستمبر آ مذاکرات نا وڑ تے ہُننگ آن پد اسلام آباد مارچ نا پڑو کننگک،حافظ نعیم الرحمن

کراچی، امیر جماعت اسلامی پاکستان حافظ نعیم الرحمن پارینے کہ ملک آ اسہ مخصوص ءُ تپہ اسے نا کوزہ ءِ، بادشاہی کروک تپہ قوم انا مقدر نا فیصلہ غاتے کیک وخت اس کہ مخصوص تپہ ءِ ہر کہول آ آسراتی و فائدہ تننگ انگ ءِ۔ جماعت اسلامی اشرافیہ نا کوزہ غان نجات و الس نا حق آتے کن جہد کننگ اٹی ءِ، دھرناک الس نا رکھ و اوفتا آخبت کن ءُ، اوفتا ہچ ءُ جندی یا سیاسی ایجنڈا اس اف۔ دا خیال تا درشانی او ادارہ نور حق کراچی ٹی کانفرنس آن تران کرسا کرے۔ حافظ نعیم الرحمن پارے کہ اگہ دھرنا نزور یا بے سہب مس تو اونا فائدہ بیرہ اشرافیہ ءِ مریک، ہندا سوب آن کل سیاسی جماعت آک تینا اختلاف آتے اسہ کنڈ آ تخسا السی خواست آتیا جماعت اسلامی نا تحریک نا کمک ءِ کیر۔ 10 ستمبر نا مذاکرات نا وڑ تے ہرسا اسلام آباد مارچ انا پڑو کننگک و دا رد اٹ ایلو اپوزیشن جماعت آتتون ہم سلاہ کننگک۔ حکومت مذاکرات اٹی سنجیدہ متو تو اسلام آباد نا کنڈ آ مارچ کینہ۔ او پارے کہ جماعت اسلامی نا دھرناتے مچ آ ملک اٹی 25 دے مننگ اٹی ءِ و 32 ہند آ برجا ءُ۔ گورنر ہاؤس آ تدوک آ دے بھلو کچ اسے ٹی الس ساڑی ئس۔ 11 ستمبر آ گوجرانوالہ ٹی بھلو السی جلسہ اس وخت اس کہ 12 ستمبر آ اسلام آباد اٹی زالبول آتا بھلو جلسہ اس مریک۔ حکومت جماعت اسلامی تون مذاکرات کن حوال کرینے، نن پیدوار کرینن کہ الس ءِ دمدستی ریلیف تننگے۔ امیر جماعت اسلامی پارے کہ پٹرولیم آ خلوک ٹیکس آک بھلو ویل اسے ءُ، پٹرولیم لیوی نا جہانی منڈی نا نہاد آتتون ہچ تعلقداری اف بلکہ دا حکومتی نابودی و غلط زرگزرانی پالیسی تا سوب آن ءِ۔ جماعت اسلامی لیوی ءِ چٹفنگ کن حکومت ءِ سلاہ تسنے و تکنیکی کمیٹی تینا خواست آتے ہم پیش کرینے۔