بلوچستان اسمبلی،قائمہ کمیٹی داخلہ نا دیوان، نیشنل پارٹی نا خیر جان بلوچ چیئرمین گچین

کوئٹہ، بلوچستان صوبائی اسمبلی نا قائمہ کمیٹی داخلہ نا دیوان اسمبلی نا کمیٹی روم اٹی اڈ ہلک۔ باسک آتا امنائی اٹ خیر جان بلوچ ءِ کمیٹی نا چیئرمین گچین کننگا۔ دیوان اٹی علی مدد جتک، صوبائی وزیر داخلہ ضیاء اللہ لانگو، اصغر علی ترین، زرین مگسی و عبیداللہ گورگیج بشخ ہلک، وخت اس کہ خاص سلہ غا قائد حزبِ اختلاف میر یونس عزیز زہری ہم دیوان اٹی ساڑی مس۔ داوخت آ سیکرٹری بلوچستان صوبائی اسمبلی طاہر شاہ کاکڑ، ایڈیشنل چیف سیکرٹری داخلہ حمزہ شفقات، ایڈیشنل سیکرٹری کانود سعید اقبال، خصوصی کمکار داخلہ بابر یوسفزئی و ایلو تعلقدار کمامدار آک ہم ساڑی ئسر۔ دیوان اٹی “بلوچستان سٹیزن فسیلیٹیشن اینڈ گڈ گورننس بل، 2026” آشرہ کننگا۔ بل انا مسخت صوبہ ٹی شاری تے آسراتی تا فراوانی و حکمرانی نا جوان وڑ اکن اسہ جوان و پرسجو سول انتظامی نظام جوڑ کننگ ءِ۔ بل انا رِد اٹ سول انتظامیہ نا زمواری تے پیدوار کننگ تون اوار شاری آسرات کاری، غاو تا ایسری، بین المحکمہ رابطہ کاری، کارکڑد نا بنداو آ پرسجو و شاہدی تا بنداو آ کروک فیصلہ سازی کن بھرمی نظام پیدوار کننگ نا سلاہ تننگانے۔ داکان بیدس صوبائی محکمہ، ضلعی انتظامیہ و ہندی کمامدار آتا نیام اٹی گچین رابطہ کاری نا کمک اٹ السی خذمت آتا بھرمی فراوانی ءِ پک کننگ آ ہم زور شاغنگانے۔ کمیٹی بل انا جتا جتا ٹک آتیا جم سجفے۔ باسک آک تینا سلاہ تے پیش کریر و بل انا جتا جتا پہلو تیا گپ وتران کریر۔ دیوان نا اخیر اٹ چیئرمین کمیٹی خیر جان بلوچ باسک آتا بشخ ہلنگ وجوان سلاہ تننگ آ اوفتا منتواری ءِ ہرفے۔