کوئٹہ ٹی یومِ دفاع پاکستان نا ریلی، پاکستان زندہ باد نا نعرہ

کوئٹہ، پاکستان مسلم لیگ (ن) نا بلوچستان اسمبلی نا باسک حاجی ولی محمد نورزئی نا کماشی ٹی کوئٹہ ٹی یومِ دفاع پاکستان نا وخت آ اسہ شرفدار ءُ ریلی اس اڈ تننگاہراٹی شاری تا بھلو کچ اس بشخ ہلک۔ ریلی ٹی شریدار آک تینا دو تیٹی پاکستانی بیرک آتے ہرفیسر و پاکستان زندہ باد نا نعرہ خلکرہ، ہرانا سوب آن مچ آ شار اٹ توار پناکہ۔ ریلی نا شریدار آتیان تران کرسا حاجی ولی محمد نورزئی پارے کہ پاکستان نا سلامتی، وتواجہی و رکھ اکن مچ آ قوم اسٹ ءِ‘ یومِ دفاع ننے پاک فوج انا شہید و غازی تا قربانی تے یات ترفک، ہرافک وطن نا رکھ اکن تینا جان تے ندر کریر۔ او پارے کہ پاکستان کن جان ندر کروک شہید آک قوم نا حقی ہیروک ءُ و نن اوفتا دا بھلا قربانی تے ہچ ءُ وڑ اسے ٹی گیرام کپنہ۔