نیم جان آ بندغ آتا راجی آسودہی کل راج انا اسیجائی زمواری ءِ،ڈی جی میر سیف اللہ کھیتران

کوئٹہ، ڈائریکٹر جنرل سوشل ویلفیئر بلوچستان سیف اللہ کھیتران پارینے کہ صوبائی حکومت نیم جان بندغ آتا بحالی، واکداری و اوفتے راج انا فعال و عزتدار بشخ اس جوڑ کننگ کن عملی گام گیج کننگ ءِ، دا رد اٹ محکمہ سوشل ویلفیئر بلوچستان نا کنڈآن حقدارمعذور بندغ آتے ہن و بر نا آسانی فراوان کننگ کن سکوٹیز (مخصوص موٹر سائیکل) و ٹرائی سائیکل آتا فراوانی نا ردوریسہ برجاء ءِ، دا خیال آتا درشانی او نیام جان بندغ آتے ٹرائی موٹر سائیکل تننگ نا دود آن تران کرسا کرے۔ او پارے کہ صوبائی وزیر و پارلیمانی سیکرٹری سوشل ویلفیئر حاجی ولی محمد نورزئی نا خاص کلہو و راہشونی ٹی محکمہ سوشل ویلفیئر نیم جان بندغ آتا راجی آسودہی و اوفتے راج اٹ بریبر وارخواہی تننگ کن جتا جتا عملی گام گیج کننگ ءِ۔ ڈائریکٹر جنرل سوشل ویلفیئر سیف اللہ کھیتران پارے کہ سکوٹی و ٹرائی سائیکل نا فراوانی نا مسخت معذور بندغ آتے ہن و بر اٹی آسانی تننگ، اوفتا پت اٹی ودکی و اوفتے تینے آ سیبو کنگن نا کنڈآ دننگ ءِ تانکہ او تینا ہڑدے ئی زند انا کاریم تے زیات آسانی اٹ سرتننگ کیر۔ او پارے کہ محکمہ سوشل ویلفیئر بلوچستان دا ہیت ءِ پک کننگ کن کوشست کننگ ءِ کہ راج انا حقدار و خاص بندغ آتے اوفتا حق ءِ بے فرق تننگے و اوفتے عزتدار، واکدار و وتواجہ زند اس گدریفنگ کن ہر وڑ انا کمک تننگے۔ سیف اللہ کھیتران پارے کہ نیم جان بندغ آتا راجی آسودہی بیرہ حکومت نا زمواری اف بلکن پورو راج انا اسیجائی زمواری ءِ، انتئے کہ راج انا کل تپہ غاتا فرض ءِ کہ او نیم جان بندغ آتا بحالی، تعلیم، روزگار کن تینا کڑد ءِ ادا کیر۔ او دا عزم انا درشانی ءِ کرے کہ محکمہ سوشل ویلفیئر بلوچستان آخبت اٹ ہم نیم جان بندغ آتا گرج آتے مون آ تخسا آسودہی گام گیج آتا ردوریسہ ءِ برجا تخک تانکہ اوفتے راج انا واکدار، متحرک و فعال بشخ اس جوڑ کننگ مرے۔