پوسکن آ دور اٹی معلومداری تسکان رسینگ گیگ کن ڈیجیٹل آسراتی المی ءِ،محمد رمضان پلال

اُستا محمد، ڈپٹی کمشنر اُستا محمد محمد رمضان پلال بلوچستان اسپیشل ڈویلپمنٹ انیشی ایٹو BSDI نا رد اٹ پوسکن تفوک ڈیجیٹل لائبریری نا دورہ ءِ کرے ہراڑے او ڈٹ آ برجا تفوئی کاریم نا جم جاچ ءِ ہلک و اونا پیشرفت نا جاچ ءِ ہلک۔ دا وخت آ ایکسین بلڈنگ یاسین چانڈیو و ایس ڈی او بلڈنگ عاشق علی بوہڑ ہم اوڑتون اوار ئسر۔ دورہ نا وخت آ ڈپٹی کمشنر ءِ ڈٹ انا جتا تفوئی ریسہ و برجا کاریم نا رد اٹ بریفنگ تننگا۔ او ڈٹ انا اہمیت آ ہیت کرسا پارے کہ پوسکن آ دور اٹ تعلیم، پٹ وپول و معلومداری تسکان آسان رسینگ گیگ کن ڈیجیٹل آسراتی تا فراوانی المی ءِ۔ ڈیجیٹل لائبریری جوڑ کننگ مار ومسڑطالب علم ورنا و ایلو شاری تے پوسکنوڑ تعلیمی وسیلہ غاتیان فائدہ ہرفنگ نا وارخواہی فراوان کننگ اٹی اہم کڑد ادا کیک۔ ڈٹ انا رد اٹ ڈیجیٹل لائبریری تون اوار آئی ٹی ہب IT Hub ہم جوڑ کننگک ہراڑے ورناتے پوسکنوڑ ٹیکنالوجی تون تعلقدار چاہنداری تے ہیل کننگ نا وارخواہیک دوئی مریرہ‘ دا ہندا ٹ ڈیجیٹل اسکلز، فری لانسنگ و ای کامرس تون اوار ایلو پوسکنوڑ بشخ آتیٹی ہیلکاری فراوان کننگ نا پاننگانے ہرانا کمک اٹ ورناک تینا لائخی تے مون آ اتنگ کیرہ و آن لائن روزگار و کاروبار نا پوسکن آ وارخواہی تیان فائدہ ہرفنگ نا لائخ جوڑ مننگ کیرہ۔ ڈیجیٹل لائبریری و آئی ٹی ہب انا جوڑ کننگ خاص وڑ اٹ اُستا محمد نا ورنا تیکن اسہ اہم ءُ پیشرفت اسے، انتئے کہ ڈیجیٹل چاہنداری تا دوئی کننگ اوفتے پوسکنوڑ زرگزران نا خواست آتتون ہم گرنچ کننگ، تینا روزگار نا است بڈی و زرگزرانی وتواجہی نا گمان تے ودفنگ اٹی کمک تننگ کیک۔ دا ڈٹ آن طالب علم آتے تعلیمی مواد و ڈیجیٹل معلومداری اسکان رسینگ گیگ نا گچین وارخواہی ہم فراوان مننگ نا اومیت ءِ۔ ڈپٹی کمشنر محمد رمضان پلال ڈٹ انا اہمیت نا رد اٹ تفوئی کاریم نا آب و پیشرفت آ چکار کننگ نا گرج آ زور شاغا تاکہ دا اہم انگا شونداری ڈٹ ءِ پوروی اسکان سرکرسا الس خاص وڑ اٹ ورناتے داڑان پورو فائدہ رسیفنگ مرے۔ دا ڈٹ ضلع اُستا محمد اٹی تعلیمی شونداری‘ پوسکنوڑ ٹیکنالوجی نا شون تننگ‘ ڈیجیٹل آگاہی و ورنا تا فنی و کسبی کاریمی کچ اٹ ودکی نا کنڈ آ اسہ اہم ءُ گام اسے، ہرا آخبت اٹی ورنا چین اکن تعلیم، ہنر و روزگار نا پوسکن آ گمان تے ودی کننگ اٹی کمکار مننگ کیک۔