استاد آتا حق و تنظیم آتا سیوت کن مدام اصولی جہد کرینن،حفیظ اللہ عیسیٰ زئی

قائد اساتذہ حفیظ اللہ عیسیٰ زئی تون گورنمنٹ ٹیچرز ایسوسی ایشن نا مسکوہی بنجائی چیئرمین شان رند، بنجائی راہشون میر ہزار خان مری، ذوالفقار بگٹی، ایم حسنی، بنجائی راہشون عبدالرحمن خلجی و ضلع کچھی نا آرگنائزر نذیر احمد رائیجہ اوڑدہی کریر، ہراٹی گورنمنٹ ٹیچرز ایسوسی ایشن نا تنظیمی فعالیت، استاد آتے مون تروک ویل، تنظیم نا ساڑی حالیت، آخبت نا لائحہ عمل و ایلو اہم باندات آتیا جم گپ وتران کننگا۔ دا وخت آ قائدِاساتذہ حفیظ اللہ عیسیٰ زئی ہیت وگپ کرسا تینا سنگت آتا است انا سِخت اٹ کروک جہد، قربانی و تنظیم کن اوفتا استقامت ءِ خراجِ تحسین پیش کرسا پارے کہ او کل سنگت آتا خذمت آتے شرف ایتک و تنظیم نا سوگوی ٹی ہر کارندہ و راہشون نا کڑد بھاز اہم ءِ‘ او پارے کہ نن مدام استاد آتا حق آتا رکھ و تنظیم ءِ اسیجا و سوگو تخنگ کن اصولی جہد کرینن و ہچ ءُ ریسہ اسے آ جندی فائدہ غاتے تنظیمی فائدہ غاتیا اولیت تتنن‘ انتئے کہ استاد آتا بقا، طاقت و سرسہبی تین پہ تینی سیوت اٹی ءِ۔ او مستی پارے کہ ساڑی حالیت آتا خواست دادے کہ کل استاد و تنظیمی راہشونک تین پہ تینی اختلاف آتیان ایڑتر مرسا اسہ پلیٹ فارم اسے آ مچ مریر و استاد آتے مون تروک ویل آتا ایسری، اوفتا روا انگا حق آتا دوئی کننگ و گورنمنٹ ٹیچرز ایسوسی ایشن ءِ پین فعال و سوگو کننگ کن اسیجائی جہد کیر، انتئے کہ اسہ سوگو و منظم تنظیم استاد تا ویل آتا بھرمی ایسری و اوفتا حق آتا رکھ انا ضمانت مننگ کیک۔ مچھ (نامہ نگار)