پمز واقعہ نا اِرادے اٹی انکوائری رپورٹ ءِ جمع کننگ نا پارت کننگانے،بنجائی وزیرِ کانود

اسلام آباد، بنجائی وزیرِ کانود اعظم نذیر تارڑ پارینے کہ پمز اٹی مروک واقعہ است ہسونی نا سوب ءِ، آخبت اٹی دا وڑ انا شکست آتیان بچنگ کن پبی سلاہ و سفارش بایدے برے۔ جمعہ نادے آ قومی اسمبلی ٹی پاکستان انسٹی ٹیوٹ آف میڈیکل سائنسز اٹی مروک واقعہ غا شرہ نا بناغا او ایوان ءِ پارے کہ پمز اٹی پیش بروک شکست است ہسونی ناسوب ءِ ہراڑا مچ آ قوم ڈکھیا ءِ۔ بنجائی وزیر پارے کہ شکست آک اناگت مفنہ‘ انت اس کہ مس او سہی اف، شکست نا سوب آتے معلوم کننگ کن وزیراعظم محمد شہباز شریف کمیٹی اس جوڑ کرینے، ہمو دے اسہ اہم ءُ دیوان اس مس، ہرا اِرا گھنٹہ برجاسلیس، دا دیوان اٹی اسلام آباد و ہسپتال نا انتظامیہ نا سینئر کمامدارآک ساڑی ئسر، وزیراعظم مسکوہی سیکرٹری داخلہ شاہد خان ءِ اِرادے اٹی انکوائری رپورٹ تننگ نا پارت کرے ہرا نا عبوری رپورٹ اینو شام اسکان بریک، اودے تفصیلی رپورٹءِ 7 دے اٹی تننگ نا پارت ہم کننگانے، بنجائی سیکرٹری داخلہ شاہد خان مست ہم دا وڑ انا جاست وپاست آتے کرینے، وزیرِ کانودپارے کہ پمز ہسپتال نا باندات اٹی گچینی کن اظہر کیانی نا کماشی ٹی چار باسک آ تیا تالان کمیٹی اس ہم جوڑ کننگانے ہرا پمز ہسپتال ءِ گچین جوڑ کننگ نا بابت رپورٹ پیش کیک۔ وزیرِ کانود پارے کہ سینیٹ اٹی ہم داایشو آ ہیت و گپ مننگ ءِ و وزیرِ جان جوڑی سینیٹ اٹی ساڑی ءِ۔ داٹی ہچ ہیت اف کہ دا اسہ است ہسون کروک واقعہ اس ئس، نن زہمی خاہوت آتا احساس آتے پہہ مرینہ، ہنداسوب آن ہڑتوم آ ایوان تیٹی واقعہ نا بابت سیاسی بیانیہ نا جاگہ غا اصلاح و آخبت نا بابت پبی سلاہ بایدے مون آ برے۔