کن تون اوار ہرکس کہ زموار مس بشخنگپک، مصطفی کمال

اسلام آباد، بنجائی جانجوڑی وزیر مصطفی کمال پمز ہسپتال اٹی پوسکن ودی مروک چناتا زوال مننگ نا است ہسون واقعہ غا قومی اسمبلی ٹی تران کرسا پارے کہ کن تون اوار ہر کس کہ دا واقعہ نا زموار مس اودے قاعدہ نا رِداٹ ہچ ءُ وڑ اسے نا معافی یا رعایت تننگپک۔ مصطفی کمال پارے کہ وزیراعظم پمز واقعہ نا جاست پاست کن اسہ کمیٹی اس جوڑ کرینے، سی ڈی اے (CDA) انت پارے، پمز انت پارے، دا کل ہیت آتا فیصلہ بایدے اسہ جاگہ غا مرے۔ ہرافتے اینو تینا رپورٹ ءِ جمع کروئی ءِ‘ اوفتا 48 گھنٹہ ءِ پورو مننگ کن النگے۔ او پارے کہ سینیٹ اٹی ہم کمیٹی جوڑ کننگ نا ہیت مسنے ای خواست کیوہ کہ ہڑتوم آ ایوان تا باسک آتیا تالان اسہ اسیجائی کمیٹی اس جوڑ کننگے۔ کمیٹی کن 30 دے اٹی رپورٹ پیش کننگ نا شڑت تننگے۔ ننا بنجائی مسخت ہندن گام گیج کننگ ءِ ہراڑان آخبت اٹ چناتے دا وڑ انا شکست آتیان بچفنگ مرے۔