وزیر اعلیٰ و کور کمانڈر کوئٹہ نا کماشی ٹی دیوان، کوئٹہ تون اوار صوبہ نا اہم انگا علاقہ غاتیٹی ریسہ اٹ سیف سٹی پروجیکٹ فعال کننگ نا فیصلہ

بلوچستان نا جم حالیت، امن و ایمنی‘ شونداری کاریم و السی آسودہی نا بابت 28می دفاعی و جاچ دیوان کوئٹہ ٹی اڈ ہلک، ہرانا اسیجائی کماشی ءِ وزیراعلیٰ بلوچستان میر سرفراز بگٹی و کور کمانڈر کوئٹہ کریر۔ دیوان اٹی صوبہ نا جم حالیت، امن و سوگوی‘ شونداری ڈٹ آ پیش رفت، السی آسودہی و چندی بنجائی و صوبائی ادارہ غاتا نیام اٹی گچین گام گیج آتا جم جاچ ءِ ہلنگا۔ دیوان اٹی بلوچستان نا روشنا آخبت شونداری ڈٹ آتا وخت آ پوروی و الس ءِ گچین آسراتی تا فراوانی نا عزم انا دوارگی کننگا۔ دیوان اٹی صوبائی و بنجائی ادارہ و سیکورٹی فورس آتا اسیجائی کوشست آتے پین بھرمی کننگ، تین پہ تینی حوال و کمکاری ءِ گچین کننگ تون اوار صوبہ نا السی فائدہ غاتیٹی پین گام گیج آتیا سجفنگا۔ دیوان نا وخت آ صوبائی درالحکومت کوئٹہ تون اوار صوبہ نا اہم انگا علاقہ غاتیٹی ریسہ اٹ سیف سٹی پروجیکٹ فعال کننگ نا اصولی فیصلہ ہم کننگا۔ بشخ ہلوک آک دا ڈٹ ءِ شاری تا رکھ‘ چاروکی نا نظام اٹی جوانی و پوسکنوڑ ٹیکنالوجی نا بھرمی کاریم اٹ اتنگ نا بابت اسہ اہم ءُ شونداری اس گوندانو۔ دیوان آن تران کرسا وزیراعلیٰ بلوچستان میر سرفراز بگٹی پارے کہ دا دیوان باقاعدگی اٹ اڈ ہلنگ انگ ءِ، ہرا نا مثبت بھرم صوبہ ٹی امن و سوگوی نا دروشم اٹی مون آ بسنے۔ وزیراعلیٰ پارے کہ ہر 3 ہفتہ غان پد اڈ ہلوک دفاعی و جاچ دیوان نا بنداوی مسخت مسکوہی دیوان تیٹی مروک فیصلہ غاتا عملدرآمد نا جاچ ہلنگ، مون تروک ویل آتا پیدواری و اوفتا ایسری کن گچین سُج پام اس سجفسا کاریم اٹ اتنگ ءِ۔ او پارے کہ باقاعدگی اٹ اڈ ہلوک دیوان تیان ادارہ غاتا نیام اٹی تین پہ تینی رابطہ غاک پین گچین مسنو و امن و سوگوی کن کنے گام گیج آتیٹی گچینی ودی مسنے۔ میر سرفراز بگٹی پارے کہ بلوچستان اٹی مدامگی امن، شونداری و السی شونہالی اسہ ایلو تون گنڈوک ءُ۔ حکومت صوبہ ٹی امن و سوگوی تون اوار اوار شونداری ڈٹ آتا وخت آ پوروی و الس ءِ بنداوی آسراتی تا فراوانی کن پورو وڑ اٹ سنرینگوک ءِ۔ او پارے کہ بلوچستان نا روشنا آخبت کن کل تعلقدار ادارہ غاتے تینا زمواری تے بھرمی وڑ اٹ سر تروئی تمک و السی فائدہ نا ڈٹ آتیا عملدرآمد اٹی سٹی ہرے کننگپ۔ دیوان اٹی بنجائی و صوبائی ادارہ، جتا جتا محکمہ و سیکورٹی فورس آتا نمائندہ غاک بشخ ہلکر۔ بشخ ہلوک آک صوبہ ٹی امن وایمنی نا حالیت، برجا گام گیج و آخبت نا سُج پام آ جم شرہ کریر۔ دیوان نا وخت آ دا تُو اٹی فتنہ الہندوستان تون تعلقدار دہشت گرد آتا برخلاف سرسہب انٹیلی جنس بیسڈ آپریشن تیا سیکورٹی فورس آتا کسبی کارکڑد و قربانی تے خراجِ تحسین پیش کننگا۔ بشخ ہلوک آک دہشت گردی نا برخلاف سیکورٹی فورس آتا عزم و بھرمی کارروائی تا ستاءِ کرسا امن برجا کوشست آتے پین گچین جوڑ کننگ نا گرج آ زور شاغار۔ دیوان اٹی دا باندات آ ہم امنا کننگا کہ بلوچستان نا امن، شونداری و السی آسودہی کن بنجائی و صوبائی ادارہ و سیکورٹی فورس آتا نیام اٹی بھرمی رابطہ و تین پہ تینی کمکاری نا ردوریسہ ءِ پین سوگو جوڑ کننگک۔ دیوان نا بشخ ہلوک آک دا عزم انا دوارگی ءِ کریر کہ بلوچستان نا الس نا جان و مال انا رکھن‘ امن و سوگوی نا شون تننگ، شونداری کاریم تیٹی ترندی و السی آسودہی کن کل ساڑی وسیلہ غاتے کاریم اٹ اتنگک۔