الس ءِ گچین طبی آسراتی تا فراوانی حکومت نا اولیت آتیٹی اوار ءِ، ڈپٹی کمشنر کچھی ممتاز کھیتران

ڈپٹی کمشنر کچھی ممتاز کھیتران نا کماشی ٹی ڈپٹی کمشنر آفس کچھی ٹی اسہ غاو دیوان اڈ تننگا‘ ہراٹی جتا جتا علاقہ غاتیان تعلقدار شاری‘ متبر‘ راجی شخصیت و سرکاری محکمہ غاتا افسر و نمائندہ غاک بشخ ہلکر۔ غاو دیوان اٹی الس ءِ دراست تینا ویل و غاو تے ضلعی انتظامیہ نا مون آ تخنگ نا پورو وارخواہی فراوان کننگا۔ غاو دیوان نا وخت آ شاری تا کنڈ آن جانجوڑی، تعلیم، کنوئی آ دیر بجلی، سڑک‘ ریونیو و ایلو بنداوی ویل آتا بابت غاو پیش کننگا۔ ڈپٹی کمشنر ممتاز کھیتران شاری تا غاو تے خوڑتی اٹ خف تورے و جاگہ غا ساڑی تعلقدار افسر آتے ویل آتا دمدستی و اولیتی بنداو آ ایسری کن المی پارت کرے۔دا وخت آ کچھی نا جانجوڑی محکمہ نا کارکڑد نا خاص وڑ اٹ ستاءِ کننگا۔ ڈپٹی کمشنر ممتاز کھیتران مچ آ ضلع ٹی الس ءِ جانجوڑی نا بنداوی آسراتی تا فراوانی، سرکاری جانجوڑی ہند آتاکارکڑد، ناجوڑ آتے وخت آ طبی آسراتی تا فراوانی و جانجوڑی نا چندی پروگرام تیٹی محکمہ جانجوڑی نا خذمت آتے ستا کڑزوک گوندا۔ او پارے کہ الس ءِ گچین طبی آسراتی تا فراوانی حکومت و ضلعی انتظامیہ نا اولیکو اولیت اٹی اوار ءِ۔ او محکمہ جانجوڑی نا افسر و کارندہ غاتے پارت کرے کہ جانجوڑی ہند آتیٹی ڈاکٹر و طبی کارندہ غاتا حاضری، دارو تا ساڑی گری و ناجوڑ آتے وخت آ درمان نا آسراتی ءِ امر کہ مرے پک کننگے و جانجوڑی نا بشخ اٹی برجا گام گیج آتے پین بھرمی جوڑ کننگے۔ تحصیل سنی ٹی تعلیم نا بشخ اتون تعلقدرویل آک ہم غاو دیوان اٹی پیش کننگار۔ استاد آتا غیر حاضری نا بابت غاو تیا ڈپٹی کمشنر پیدوار کرے کہ سرکاری تعلیمی ادارہ غاتیٹی استاد آتا غیر حاضری و زمواری تے ٹی ڈیوالئی ءِ ہچ ءُ وڑ اسے ٹی سگنگ مفک‘ او غیر حاضر استاد آتا برخلاف قاعدہ و ضابطہ نا رِداٹ کارروائی نا پڑو کرسا تعلقدار کمامدار آتے تعلیمی ادارہ غاتا حاضری و تدریسی سرجز آتا چاروکی نا پارت کرے۔ ڈپٹی کمشنر ممتاز کھیتران تعلیم نا بابت جتا ءُ غاو دیوان اس اڈ تننگ نا پڑو کرسا پارے کہ دا غاو دیوان اٹی تحصیل سنی تون اوار مچ آ ضلع کچھی نا تعلیمی ویل، اسکول آتیٹی استاد آتا حاضری، بنداوی آسراتی، طالب علم آتے مون تروک ویل و ایلو باندات آتا جم جاچ ہلنگک۔ او پارے کہ تعلیم نا بشخ اٹی گچینی کن کل تعلقدار ادارہ غاتے تینا تینا زمواری تے بھرمی وڑ اٹ سر تروئی تمک۔ او مستی پارے کہ ضلعی انتظامیہ السی ویل آتا ایسری کن وس انا کچ آ گام گیج کننگ اٹی ءِ‘ غاو دیوان نا اصل مسخت الس و انتظامیہ نا نیام اٹی دراست حوال ءِ سوگو کننگ و شاری تا غاو تا دمدستی ایسری ءِ۔ تعلقدار افسر آک السی غاو تے سنجیدہ ہلیر و پن کروک وخت اٹی اوفتا ایسری ءِ امر کہ مرے پک کیر۔ ڈھاڈر نامہ نگار (سمیع اللہ جلبانی بلوچ)