بی آر اے زرگزرانی آخبت اٹ اہم کڑد ادا کننگ نا لائخی تخک،وزیراعلیٰ بلوچستان میر سرفراز بگٹی

وزیراعلیٰ بلوچستان میر سرفراز بگٹی پارینے کہ بلوچستان ریونیو اتھارٹی صوبہ نا زرگزرانی آخبت اٹ اہم کڑد ادا کننگ نا لائخی تخک۔ او دا ہیت آتے بلوچستان ریونیو اتھارٹی ٹی ہائر ایجوکیشن کمیشن نا کمک اٹ تعینات مروک 19 افسر ءِ تقرری نا لیٹر بشخنگ نا دود آن تران کرسا کرے۔ وزیر اعلیٰ افسر مبارکبادی ترسا خواری، استخواہی‘ ایمانداری و ریاست تون بے شڑت وفاداری اٹ تینا زمواری تے پورو کننگ نا پارت کرے، او پارے کہ بلوچستان ریونیو اتھارٹی صوبہ نا زرگزرانی آخبت اٹ اہم کڑد ادا کننگ نا لائخی تخک۔ صوبہ نا وسیلہ غاتا اسہ بھلو بشخ اس غیر شونداری خڑچ آتا گواچی مریک، ہرانا سوب آن لس بلوچستانی نا راجی آسودہی کن کچ اٹو وسیلہ سلک۔ او پارے کہ بلوچستان ریونیو اتھارٹی آن اومیت ارے کہ او صوبہ نا ریونیو ٹی ودکی کرسا کم آن کم غیر شونداری خڑچ آتا باریم ءِ کم کننگ کن جوان وسیلہ ودی کیک۔ غیر شونداری خڑچ آتیٹی کمتی آن بچوک آ وسیلہ غاتے السی آسودہی، تعلیم، جان جوڑی، بنداوی آسراتی و ایلو شونداری اولیت آتیا خڑچ کننگ مریک۔ وزیر اعلیٰ پارے کہ محکمہ تعلیم اٹی 14 ہزار 500 آن زیات استاد آتا بھرتی میرٹ آ کننگاو بلوچستان ریونیو اتھارٹی ٹی افسر آتا ساڑی تعیناتی ہم دا پالیسی نا عملی ریسہ ءِ۔ او پارے کہ بلوچستان ریونیو اتھارٹی ٹی میرٹ نا کچ انا کساس ءِ داہیت آن خلنگ مریک کہ اونا تینا ضلع ڈیرہ بگٹی آن ہم ہچ ءُ اومیتدار اس سرسہب مننگ کتنے۔ بھرتی نا مچ آ عمل اٹ ہچ ءُ ایگزیکٹو آفس اسے آن ہچ ءُ زور اس شاغنگتو و تقرری تے 100 درسد میرٹ آ کننگا۔ وزیر اعلیٰ میر سرفراز بگٹی میرٹ ءِ پک کننگ آ صوبائی وزیر خزانہ میر شعیب نوشیروانی، چیئرپرسن بلوچستان ریونیو اتھارٹی عبداللہ خان نورزئی و مچ آ ٹیم ءِ خراج تحسین پیش کرسا پارے کہ شفاف و میرٹ آ تالان بھرتیک ورناتا ریاستی ادارہ غاتیاپت ءِ بحال کننگ نا گچین وڑ ءِ۔ او پارے کہ بلوچستان ریونیو اتھارٹی نا ورنا افسر آک سِخت‘ خواری، استخواہی و کسبی لائخی تا کمک اٹ پک مروک ہدف آتے دوئی کننگ کن کاریم کیر۔