فیلڈ مارشل سید عاصم منیر نا ایران نا دورہ بھاز سرسہب و بھرمی ئس،ایرانی صدارتی دفتر

ایرانی صدارتی دفتر فیلڈ مارشل سید عاصم منیر نا ایران نا دورہ ءِ بھاز بھرم تروک و فائدہ نا سوب گوندانے۔ ایرانی صدارتی دفتر نا ترجمان سید مہدی طباطبائی نا رِداٹ فیلڈ مارشل سید عاصم منیر نا دورہ نا وخت آ بھلا کہول آ سفارتی سرسہبی دوئی مسنے۔ او پارے کہ دا دورہ نا مثبت بھرم زوت مون آ بریک۔ ایرانی صدارتی دفتر نا رِداٹ فیلڈ مارشل سید عاصم منیر نا دورہ پاکستان و ایران نا نیام اٹی تعلقداری ءِ پین سوگو کننگ و تین پہ تینی کمکاری نا شون تننگ نا رد اٹ بھرم تروک پک مسنے۔ ایرانی کمامدار آک دا اومیت درشان کریر کہ دورہِ ایران نا وخت آ مروک گپ وتران وپک مروک پیش رفت نا عملی بھرم بروک آ دے تیٹی پیدوار و نمان مریک۔ دا رد اٹ بنجائی وزیر داخلہ محسن نقوی پارینے کہ فیلڈ مارشل سید عاصم منیر و اونا ایران نا صدر تون اسہ اہم و گچین اوڑدہی اس مس ہراٹی ایران و امریکہ نا نیام اٹ چک وتاڑ‘ نیامی دے ٹک نا ساڑی حالیت و امن کن آخبت نا حکمت عملی آ سرجمی اٹ گپ وتران کننگا۔ داکان بیدس ”اسلام آباد مفاہمت نا یادداشت“ نا پورو بحالی و چک وتاڑ نا پرامن ایسری کن ہڑتوم آ کنڈ آن المی گام گیج آتیا گپ وتران کننگا۔ سوشل میڈیا پلیٹ فارم ”ایکس“ آ جاری کلہو اٹ وزیر داخلہ پارے کہ ایرانی صدر تینا حکومت نا موقف و گڑتی تے پیدوار وڑ اٹ مون آ تخا، ہراڑا ہڑتوم آ کنڈ آن مثبت گپ وتران مس۔ او پارے کہ اوڑدہی ٹی نمان پیش رفت مسنے۔ او دا اومیت نا درشانی ءِ کرے کہ دا پیش رفت ڈیہہ اٹی مدامگیامن و سوگوی کن کمکار مریک۔