پاکستان نا زرگزرانی حالیت و جوانی اتنگ آ جہانی پت ودنگ اٹی ءِ،جرمن سفیر

پاکستان اٹی جرمنی نا سفیر انا آلیپل پاکستان نا گچین مروک زرگزرانی حالیت آ است جمی نا درشانی ءِ کرسا پارے کہ پاکستان نا زرگزرانی حالیت و اصلاحات آ جہانی پت پدریسہ ودنگ اٹی ءِ و او پاکستان تون زرگزرانی و واپاری حوال آتے پین سوگو کننگ اٹی است خواہی نا درشانی کرے۔ جرمن سفیر وزیر خزانہ محمد اورنگزیب تون اوڑدہی کرے۔ جرمن سفیر انا آلیپل پاکستان نا جوانی نا کنڈ آ ہنوک زرگزرانی حالیت آ است جمی نا درشانی کرے و پاکستان نا وتواجہ کریڈٹ ریٹنگ اٹی گچینی آ وزیر خزانہ ءِ مبارکبادی تس۔ جرمن سفیر پارے کہ پاکستان نا زرگزرانی حالیت و اصلاحات آ جہانی پت ودنگ اٹی ءِ۔ وزیر خزانہ زرگزرانی سوگوی و مالیاتی نظم و ضبط کن حکومتی گام گیج آتیان سفیر ءِ معلومدار کرے۔ پاکستان اٹی جرمن کمپنی تا کاروبار و زرکاری نا شون تننگ آ جم گپ وتران کننگا۔ وزیر خزانہ پارے کہ پالیسی ریسہ‘ واپاری آسراتی و ادارہ ئی اصلاحات بھاز المی ءِ۔ ایف بی آر نا ڈیجیٹلائزیشن آن ٹیکس نظام اٹی شفافیت و کارکڑد پین گچین مریک‘ ڈیجیٹل اصلاحات آن جہانی کمپنی تیکن کاروباری چاگڑد پین آسان مریک۔ جرمنی پاکستان تون اقتصادی کمکاری و واپاری حوال آتے پین سوگو کننگ اٹی استخواہی نا درشانی کرے‘ جرمن سفیر پارے کہ او جرمن کمپنی تا و پاکستانی کاروباری ادارہ غاتا نیام اٹی کمکاری ءِ ودفنگ نا مخ تفی ءِ کیک۔ جرمن سفیر وزیر خزانہ محمد اورنگزیب ءِ ایشیا پیسیفک کانفرنس آف جرمن بزنس اٹی بشخ ہلنگ نا سلہ ہم خلک۔ 19 می ایشیا پیسیفک کانفرنس آف جرمن بزنس دا سال سیول اٹی مریک۔ پاکستان و جرمنی زرگزرانی کمکاری و واپاری حوال آتے پین ودفنگ نا عزم انادوارگی ءِ کریر۔