بلوچستان و پاکستان نا اینو و آخبت اسٹ ءِ، و مدام اسٹ سلک،فیلڈ مارشل سید عاصم منیر

آرمی چیف و چیف آف ڈیفنس فورسز فیلڈ مارشل سید عاصم منیر پارینے کہ بلوچستان اٹ امن وسوگوی زرکاری نا شون تننگ و صوبہ نا انسانی و قدرتی وسیلہ غااتے الس نا شونہالی ٹی بدل کننگ کن المی ءِ۔ فیلڈ مارشل عاصم منیر تون بلوچستان نا اہم انگا شخصیت و سیاسی سرکڑدہ غاک اوڑدہی کریر‘ شریدار آک سیکورٹی فورس آتتون پورو کننگ نا عزم انا دوارگی ءِ کرسا پاریر کہ راستی مونی کاہک وخت اس کہ دشمن واکدار آتا دروغ نا بیانیہ افتا تینا غوغا و فریب اٹ کھڈ مریک۔ آئی ایس پی آر نا رِداٹ آرمی چیف و چیف آف ڈیفنس فورسز فیلڈ مارشل سید عاصم منیر اوڑدہی نا وخت آ پارے کہ بلوچستان و پاکستان نا اینو و آخبت اسٹ ءِ و مدام اسٹ سلک‘، بلوچستان لائخ سوگو سلوک و محب وطن‘ شرفمند الس نا ہند ءِ۔ مدامگی امن و سوگوی بلوچستان نا حقی زرگزرانی لائخی تے کاریم اٹ اتنگ کن بنداوی اہمیت تخک۔ فیلڈ مارشل عاصم منیر پیدوار کرے کہ بلوچستان اٹ امن و سوگوی زرکاری نا شون تننگ و صوبہ نا انسانی و قدرتی وسیلہ غاتے الس نا شونہالی ٹی بدل کننگ کن المی ءِ۔ بلوچستان نا ورنا تیٹی لائخی و و وارخواہی تا ہچ ءُ کمتی اس اف، ورنا راج انا کل آن متحرک و اومیتی آتپّہ ءِ۔ فیلڈ مارشل عاصم منیر پارے کہ ورناتے واکدار جوڑ کننگ و قومی شونداری ٹی کڑد ادا کننگ نا وارخواہی فراوان کننگ مدامگی شونداری کن بنجائی اہمیت تخک۔ او پارے کہ فتنہ الخوارج و فتنہ الہندوستان بلوچستان ءِ نزور کننگ کن دشمن آتا درملکی پراکسیز ءُ، دشمن آک بلوچستان نا شونداری ءِ بھس کننگ و و ریاست و الس نا نیام اٹی مُری ودی کننگ نا کوشست کننگ اٹی ءُ، قوم انا اسیجائی عزم و ریاست نا نزورمفروک فیصلہ کن و پبی ردِ عمل آن دشمن نا لغور آ ارادہ غاتے بے سہب کننگک۔ فنانشل ٹائمز و سیکورٹی سورس نا رد اٹ فیلڈ مارشل عاصم منیر بلوچستان نا اہم انگا شخصیت و راجی راہشون تا امن، راجی ہم گرنچی و مثبت قومی مکالمہ نا شون تننگ اٹ کڑدانا ستاءِ کرسا پارے کہ دشمن نا منفی غوغا تا بے خلیس و جم وڑ اٹ مون تننگ نا گرج ءِ۔ دروغ نا بیانیہ غاتے پاش کننگ و بلوچستان نا راستی لائخی، شونداری و الس نا گرج آتے مونی اتنگے۔ فیلڈ مارشل عاصم منیر مستی پارے کہ بلوچستان نا تقدیر بیرہ بلوچستان نا الس نا دو تیٹی ءِ۔ اوڑدہی ٹی بلوچستان نا اہم شخصیت و شریدار آک امن، شونداری و شونہالی کن عزم نا دوارگی ءِ کریر و درملکی اسپانسرڈ آتا برخلاف ریاست و سلہہ بند فوج انا ہم کوپہ سلنگ نا عزم انا درشانی ءِ کریر۔ اوڑدہی ناوخت آ شریدار آک الس دوست شونداری نا کمک اٹ پرامن، سوگو و شون ہلوک بلوچستان کن تینا کڑدار ادا کننگ نا ارادہ نا دوارگی ءِ کریرو پاریر کہ راستی مونی کاہک وخت اس کہ دشمن واک آتا دروغ نا بیانیہ تینا جند انا غوغا و فریب اٹ کھڈ مریک۔