بھارتی کاٹم خواجہی ٹی امن ءِ خراب کننگ نا ہر کوشست ءِ بے سہب کینہ،وزیراعلیٰ میر سرفراز بگٹی

وزیراعلیٰ بلوچستان میر سرفراز بگٹی مستونگ، مچھ، خضدار و پنجگور سمیت صوبہ نا جتا جتا علاقہ غاتیٹی دہشت گرد آتا برخلاف سیکورٹی فورس و کانود نافذ کروک ادارہ غاتا سرسہب کارروائی تیا است جمی نا درشانی ءِ کرسا سیکورٹی فورس آتے خراجِ تحسین پیش کرینے۔ وزیراعلیٰ پارے کہ بلوچستان اٹی 37 دہشت گرد آتا خلنگ اسہ بھلو سرسہبی اسے و دا کارروائیک امن دشمن آتا برخلاف ریاستی ادارہ غاتا بھرمی حکمت عملی و کسبی لائخی تا شاہدی ءُ۔ تینا اسہ بیان اسے ٹی وزیراعلیٰ بلوچستان میر سرفراز بگٹی پارے کہ سیکورٹی فورس آک مستونگ، مچھ، خضدار و پنجگور اٹی دہشت گرد آتا برخلاف وخت آ و بھرمی کارروائی کرسا تینا کسبی چاہنداری‘ بہادری و عزم انا عملی درشانی ءِ کرینو۔ او دا کارروائی تیٹی بشخ ہلوک سیکورٹی کارندہ غاتے خراجِ عقیدت پیش کرسا پارے کہ ملک و قوم انا رکھ و امن کن اوفتا خذمت آک ستا کڑزرہ۔ وزیراعلیٰ پارے کہ بلوچستان اٹی امن و ایمنی نا حالیت ءِ جوانی نا کنڈ آ اتنگ صوبائی حکومت نا اولیکو اولیت آتیٹی اوار ءِ و دا مسخت کن کل تعلقدار ادارہ غاتون اوار مرسا بھرمی گام گیج کننگ انگ ءِ۔ او پارے کہ صوبہ نا الس دہشت گردی نا برخلاف جنگ اٹی بے کچ قربانی تسنے و داسہ وخت بسنے کہ امن دشمن آتا برخلاف فیصلہ کن گام گیج آتا کمک اٹ اوفتا نیٹ ورکس آتے چٹفنگے۔ میر سرفراز بگٹی پارے کہ دہشت گردی نا برخلاف جنگ اٹی سیکورٹی فورسز و کانود نافذ کروک ادارہ غاتا قربانیک قوم انا عزم و حوصلہ ءِ پیدوار کیرہ۔ او پارے کہ سیکورٹی کارندہ غاک تینا ساہ انا پرواہ ءِ کپرسا ملک و صوبہ ٹی امن کن زمواری سر ترسا بسنو وخت اس کہ الس دہشت گردی نا برخلاف ریاستی ادارہ غاتتون اوار سلوک ءِ۔ او پارے کہ داسہ نا کارروائی تیٹی دہشت گرد آتا برخلاف دوئی مروک سرسہبی دا ہیت انا شاہدی ءِ کہ سیکورٹی فورس آک امن دشمن آتا برخلاف بھرمی وڑ اٹ کارروائی کننگ نا بود تخرہ۔ او پارے کہ دہشت گرد نیٹ ورک آتا برخلاف پدریسہ کارروائی تیان ہمو واک آتے بھاز نسخان رسینگانے ہرافک بلوچستان نا امن و شونداری ءِ زہمی کننگ نا کوشست کننگ اٹی ءُ۔ وزیراعلیٰ بلوچستان پارے کہ دہشت گردی نا مسخت بیرہ بے گناہ شاری تے کسفنگ آخا بلکن صوبہ ٹی بیم و خلیس تالان کرسا شونداری عمل ءِ بھس کننگ و الس ءِ بنداوی آسراتی تیان محروم تخنگ ہم ارےِ۔ او پیدوار کرے کہ دہشت گرد آتے بلوچستان نا الس نا زند، پوریاگری، تعلیم، روزگار و شونداری نا عمل اٹی اڑاند شاغنگ نا موکل اسُل تننگ مفک۔ میر سرفراز بگٹی پارے کہ بلوچستان اٹی امن کن انٹیلی جنس بیسڈ آپریشن و بھرمی سیکورٹی گام گیج آتا ریسہ برجا تخنگک۔ او پارے کہ دہشت گردی نا پورو چٹفنگ اسکان ریاستی ادارہ غاک تینا کارروائی تے برجا تخرہ و اسہ علاقہ اسے ٹی ہم امن دشمن آتے دوارہ منظم مننگ نا وارخواہی تننگ مفک۔ او پارے کہ سیکورٹی فورس و کانود نافذ کروک ادارہ غاتا نیام اٹی حال حوال و معلومداری تننگ دہشت گردی نا برخلاف سرسہب کارروائی کن بھاز المی ءِ۔ داسہ نا کارروائی تیٹی ہم وخت آ معلومداری و گچین حکمت عملی نا سوب آن دہشت گرد آتا برخلاف بھرمی کارروائی مننگ کرے۔ وزیراعلیٰ پارے کہ صوبائی حکومت امن کن سیکورٹی ادارہ غاتے ہر وڑانا کمک فراوان کننگ اٹی ءِ و دہشت گردی نا چٹفنگ کن کل دوئی وسیلہ غاتے کاریم اٹ اتنگ انگ ءِ۔ او پارے کہ بلوچستان اٹی مدامگی امن نا آن بیدس زرگزرانی شونداری، زرکاری‘ روزگار و السی شونہالی نا ہدف آتے دوئی کننگ مفک۔