ایس ایم ایک زرگزران نا سوگوی ٹی بنداوی ءُ کڑد اس سر تننگ اٹی ءُ،ڈپٹی چیئرمین سینیٹ

اسلام آباد، ڈپٹی چیئرمین سینیٹ سیدال خان ناصر پارینے کہ پاکستان اٹ 71 لکھ 40 ہزار آن زیات چنکا و نیامی درجہ نا کاروبار (ایس ایم ایز) ملکی زرگزران نا سوگوی ٹی بنداوی کڑد ادا کننگ ءِ ہرا جم ملکی پیداوار (جی ڈی پی) ٹی کم وود 40 درسد، برآمد آتے ٹی 30 درسد و غیر کشاری روزگار اٹی 80 درسد آن زیات نا بھاز بھلو بشخ اس شاغرہ۔ دا خیال آتا درشانی ءِ او راولپنڈی چیمبر آف سمال ٹریڈرز اینڈ سمال انڈسٹریز نا کنڈآن ہندی ہوٹل اٹی اڈ ہلوک ”انٹرنیشنل ایس ایم ایز ایکسیلینس ایوارڈز 2026” نا دود اٹ خاص انگا مہمانِ نا وڑ اٹ تران کرسا پارے۔ او پارے کہ دا حساب وکتاب دا حقیقت نا شاہدی ءِ کہ چنکا و نیامی درجہ نا کاروبار بیرہ راجی سرجز اف بلکن پاکستان نا زرگزران نا اصل مخ ءِ، ہراتم نن چنکو کاروبار اسے سوگو کینہ تو اصل اٹ اسہ پورو خاہوت، کمیونٹی و پاکستان نا زرگزرانی آخبت اسے سوگو کینہ۔ او ورناتا کڑد ءِ مون آ تخسا پارے کہ ملک انا شونداری کن بیرہ ملازمت پٹوک ءُ آخا بلکن ملازمت ودی کروک آ ورنادرکار ءِ، پاکستان نا آبادی نا بھلا بشخ ورناتیاتالان ءِ ہرافتے بیرہ روایتی تعلیم نا جاگہ غا پوسکن کسب، ٹیکنالوجی، زر، ہیلکاری‘ و جہانی منڈی تسکان رسینگ نا گرج ءِ تانکہ او تینا کاروباری آئیڈیا تے قومی و جہانی برانڈ آتیٹی بدل کننگ کیر۔ سیدال خان ناصر چنکا پوریا گر آتا ویل آتا ذکر ءِ کرسا آسان و کم خڑچ فنانسنگ نا اہمیت آ زور شاغا۔ او حکومتی کہول آ ایس ایم ای فنانسنگ، اسٹیٹ بینک نا ریگولیٹری فریم ورک و ”2026-28 ایکسس ٹو فنانس پلان” نا رداٹ اولیتی بنداو آوام تا فراوانی نا گام گیج آتا ستاءِ کرسا پارے کہ دا ہیت ءِ پک کننگے کہ مالیاتی پالیسی تا فائدہ کاغد آتیان پیش تمسا عملی وڑ اٹ چنکا کاروباری بندغ آتسکان سرمرے۔ او زالبول آتا زرگزرانی اواری ءِ المی گوندسا پارے کہ زالبول انٹرپرینیورز آتے فنڈ، ڈیجیٹل پلیٹ فارم و مارکیٹ اسکان رسینگ تننگ اٹ زرگزرانی سرسہبی نا پوسکن ریکارڈ جوڑ کننگ مریک۔