ڈپٹی ڈسٹرکٹ آفیسر ایجوکیشن بیسمہ نا تحصیل ناگ انا اسکول آتا دورہ

ناگ، ڈپٹی ڈسٹرکٹ آفیسر ایجوکیشن بیسمہ حبیب اللہ ساسولی تحصیل ناگ انا جتا جتا سرکاری اسکول آتا دورہ ءِ کرے و ہموڑے تعلیمی سرجز، استاد آتا حاضری، اسکول ریکارڈ و بنداوی آسراتی تا خوڑتی اٹ جاچ ءِ ہلک۔ دورہ نا وخت آ او یو سی ناگ و یو سی جت انا کل فعال اسکول گورنمنٹ بوائز پرائمری اسکول جت، گورنمنٹ بوائز پرائمری اسکول چھڈ گامیشی، گورنمنٹ بوائز پرائمری اسکول چھڈ گاجیان، گورنمنٹ بوائز پرائمری اسکول کلی علی احمد دمبن، گورنمنٹ بوائز پرائمری اسکول کلی ملا عبداللہ و گورنمنٹ بوائز پرائمری اسکول کلی محمد نور کریچی و گورنمنٹ گرلز مڈل اسکول کلی محمد نور کریچی تون اوار ایلو اسکول آتا دورہ ءِ کرے۔ ڈپٹی ڈسٹرکٹ ایجوکیشن آفیسر کلاس روم تا دورہ ءِ کرے و طالب علم آتیان اوفتا سلیبس نا بابت سوج کرے۔ وخت اس کہ چنا تا تعلیمی کارکڑد و تدریسی عمل نا ہم جاچ ءِ ہلک۔ او اسکول آتا ریکارڈ نا جاچ ءِ ہلک و حاضری رجسٹر تون اوار ایلو المی کاغد آتے ہُرا۔ داوخت آ او اسکول آتیٹی پوسکن تفنگوک کمرہ غاتا ہم جاچ ءِ ہلک۔ دورہ نا وخت آ استاد آتا حاضری ءِ ہم چیک کننگا۔ غیر حاضر استاد آتا برخلاف کانودی کارروائی کننگک۔ ڈپٹی ڈسٹرکٹ آفیسر ایجوکیشن بیسمہ حبیب اللہ ساسولی استاد آتیا زور شاغا کہ او تینا حاضری ءِ پک کرسا طالب علم آتا تعلیم و ہیلکاری آ خاص چکار کیر۔ او پارے کہ سرکاری اسکول آتیٹی تعلیمی آب انا گچینی، استاد آتا باقاعدگی اٹ حاضری و طالب علم آتے آب اٹو تعلیم نا فراوانی ننا اولیکو اولیت ءِ۔ اسکول آتا چاروکی و جاچ انا داریسہ آخبت اٹی ہم برجا سلک تاکہ تعلیمی نظام ءِ پین بھرمی کننگ مرے۔