سرکاری محکمہ غاتا ماڑی و تعلقدارتنصیب آتیٹی سولر سسٹم خلنگک،ڈپٹی کمشنر نصیرآباد وریندر لعل

نصیرآباد، ڈپٹی کمشنر نصیرآباد وریندر لعل اسسٹنٹ ڈائریکٹر لوکل گورنمنٹ نا دفتر اٹی جتا جتا شونداری ڈٹ آتا ٹینڈر پراسیس نا جم جاچ ءِ ہلک۔ دا وخت آ میجر یاسر، اسسٹنٹ ڈائریکٹر لوکل گورنمنٹ احمد نواز جتک، عابد علی پہنور ایس ڈی او بلڈنگ و ایلو تعلقدار افسر آک ہم ساڑی ئسر۔ دیوان نا وخت آ تعلقدار افسر آتا کنڈ آن ڈپٹی کمشنر نصیرآباد ءِ جتا جتا شونداری ڈٹ، ٹینڈر کاغد، خڑچ‘ ٹیکنیکل و مالیاتی باندات و بولی نا عمل نا بابت حوال تننگا‘ حوال اٹ پاننگا کہ دا ڈٹ آتا رِداٹ جتا جتا سرکاری محکمہ غاتا ماڑی و تعلقدار سرکاری تنصیب آتے ٹی سولر سسٹم خلنگک۔ ہراڑان نئے بیرہ سرکاری ادارہ غاتا بجلی نا گرج آتے پورو کننگ اٹی کمک رسینگک بلکن بجلی نا خڑچ آتیٹی ہم کمتی بریک۔ ڈپٹی کمشنر نصیرآباد وریندر لعل ہرا ٹینڈر کمیٹی نا چیئرمین ہم ارے‘ ٹینڈر پراسیس نا کل ریسہ غاتا خوڑتی اٹ جاچ ءِ ہلک و تعلقدار افسر آتیان ڈٹ آتا وڑ‘ ٹینڈر کاغد، دوئی مروک بولی و ٹھیکیدار آتا کنڈ آن پیش کروک پیشکش نا بابت جم معلومداری دوئی کرے۔ او افسر آتے پارت کرے کہ ٹینڈر نا ہر ریسہ پک کروک حکومتی پالیسی، برجا کانود، قاعدہ و ضابطہ و تعلقدار کانودی خواست آتا رد اٹ پورو کننگے۔ او پیدوار کرے کہ شونداری ڈٹ آتا ٹینڈر نا عمل اٹی شفافیت‘ میرٹ و کنڈہلپننگ ءِ امر کہ مرے پک کننگے و ہچ ءُ دن ءُ گام اسے نا گنجائشت الیپنگپ ہراڑان ٹینڈر پراسیس نا سفائی زہمی مرے۔ او پارے کہ کل بولی و کاغد آتا مچ آ جاچ ہلنگ آن پد قاعدہ نا رِداٹ کڑزوک و لائق آ ٹھیکیدار ءِ سرسہب گوندنگے۔ ڈپٹی کمشنر پارت کرے کہ ہرا ٹھیکیدار پک قاعدہ و ضابطہ، تکنیکی شڑت و حکومتی پالیسی نا رِداٹ سرسہب گوندنگے اوڑکن کل کانودی و انتظامی خواست آتے پورو کننگ آن پد ورک آرڈر جاری کننگے تاکہ شونداری ڈٹ آتیا بے سلنگ آن عملی کاریم بنا کننگے و الس ءِ دا ڈٹ آتا فائدہ زُوت آن زُوت دوئی مرے۔ او مستی پارے کہ بیرہ ٹینڈر نا عمل ءِ سفا جوڑ کننگ بس اف بلکن ڈٹ آتیا عملی کاریم نا وخت آ ہم آب، ترندی و پن کروک اسپیسیفیکیشن آ مچ آ عملدرآمد ءِ پک کننگ المی ءِ۔ تعلقدار محکمہ غاتا افسر آک ڈٹ آتا باقاعدگی اٹ چاروکی ءِ کیر، تفوئی و تنصیبی کاریم نا آب ءِ چیک کیر و ہچ ءُ وڑ انا ہیبدار میٹریل نا کاریم اٹ اتنگ آ دمدستی کارروائی عمل کننگے۔ وریندر لعل پارے کہ شونداری ڈٹ السی آسودہی و سرکاری وسیلہ غاتا بھرمی کاریم اٹ اتنگ کن بنا کننگک ہندا سوب آن دا ڈٹ آتیٹی ہچ ءُ وڑ انا بے پرواہی‘ ڈیوالئی یا آب آ سمجھوتہ سگنگ مفک۔ او تعلقدار افسر آتے پارت کرے کہ ڈٹ آتا پیشرفت نا مدام چاروکی ءِ کننگے، کاریم ءِ پک وخت اٹ پورو کننگے و سرکاری فنڈ آتا کاریم اٹ اتنگ اٹی شفافیت ءِ برجا تخنگے۔ ڈپٹی کمشنر دا عزم انا درشانی ءِ کرے کہ ضلع نصیرآباد اٹی برجا شونداری ڈٹ آتا وخت آ پوروی، آب انا جوانی و سرکاری وسیلہ غاتا شفاف کاریم اٹ اتنگ ءِ امر کہ مرے پک کننگے تاکہ حکومت نا کنڈ آن السی آسراتی تا فراوانی کن جتا کروک فنڈ آک گچین وڑ اٹ السی فائدہ غا خڑچ مریر و اوفتا فائدہ غاک لس شاری تسکان سر مریر۔