بنجائی حکومت الیکشن کمیشن نا اہم تعیناتی تیا عمل بنا کرفنگ کن تیار

اسلام آباد، چیف الیکشن کمشنر و اِرا باسک آتا تعیناتی کن اہم پیش رفت مسنے و گمان ءِ کہ وزیراعظم شہباز شریف و اپوزیشن لیڈر محمود خان اچکزئی نا نیام اٹی اوڑدہی پارلیمنٹ ہاؤس اٹی مریک۔ اپوزیشن لیڈر و حکومتی ڈل انا نیام اٹی اوڑدہی نا تہہ انا حوال آک مون آ بسنو۔ حوالی نا رِداٹ بنجائی حکومت الیکشن کمیشن آف پاکستان نا اہم تعیناتی تیا عمل بناءِ کننگ کن تیار مسنے۔ دا رد اٹ تدوک آدے بنجائی وزیر تیا تالان حکومتی ڈل اپوزیشن لیڈر محمود خان اچکزئی تون اوڑدہی کرے و اوڑا وزیراعظم شہباز شریف نا کلہو ءِ سر کرے۔ حوالی نا رد اٹ وزیراعظم اپوزیشن لیڈر ءِ وزیراعظم ہاؤس بننگ نا سلہ خلکوسس ولے محمود خان اچکزئی پی ایم ہاؤس ہننگ آن بشخنداری کرسا پارے کہ او پارلیمنٹ نا کمرہ دستور اٹی وزیراعظم تون اوڑدہی کن تیار ءِ۔ حکومتی ڈل اپوزیشن لیڈر نا دا سلاہ غاامنائی درشان کرے۔ اوڑدہی نا وخت آ حکومتی ڈل محمود خان اچکزئی ءِ پارے کہ وزیراعظم شہباز شریف 19 اگست اسکان اوفتا چٹھی نا نوشتئی ورندی ءِ ایتک۔ حوالی نا رِداٹ اپوزیشن لیڈر محمود خان اچکزئی پارے کہ پارلیمنٹ ننا کل انا اسیجائی فورم اسے و الیکشن کمیشن نا تعیناتی آئینی گرج ءِ۔ او حکومتی ڈل اتون ہیت وگپ کرسا پارے کہ ملکی حالیت ننے نم تون ہیت کننگ آ بیوس کننگ اٹی ءِ‘ اگہ نم سفا انگا ہیت اٹ ہیت کننگ خوارے تو نن کمک کینہ۔ اوڑدہی ٹی بانی پی ٹی آئی نا جانجوڑی و مذاکرات نا بابت ہم گپ و تران مس۔ بنجائی وزیرک اپوزیشن لیڈر ءِ پاریر کہ وزیراعظم و نما اوڑدہی آن پد کسرک ملنگرہ۔