پاکستان ترکیہ و سعودی عرب تون اوار ی اٹ امن کن کڑد ادا کرسا کیک،وزیراعظم محمد شہباز شریف

وزیراعظم محمد شہباز شریف مکہ مکرمہ مشترکہ دفاعی معاہدہ نا بابت امریکی صدر ڈونلڈ ٹرمپ نا مخ تفی نا ستاءِ کرسا پارینے کہ پاکستان، ترکیہ و سعودی عرب تون اوار ی اٹ مچ آ ڈیہہ انا دفاع و سلامتی ءِ پک کننگ اٹ تعمیری کڑد ادا کرسا کیک۔ دوشنبے نادے آ ”ایکس“ آ تینا کلہو اٹ وزیراعظم محمد شہباز شریف پارے کہ او صدر ڈونلڈ ٹرمپ نا کنڈ آن مکہ مکرمہ مشترکہ دفاعی معاہدہ غا دستخط نا بابت مخ تفی و است بڈی نا منت واری ءِ ہرفک۔ وزیراعظم پارے کہ ایلم ملک سعودی عرب و جمہوریہ ترکیہ تون اواری اٹ پاکستان مچ آ ڈیہہ انا دفاع و سلامتی ءِ پک کننگ اٹ تعمیری کڑد ادا کرسا کیک۔ او پارے کہ او اسہ وار ولدا صدر ٹرمپ نا جیرتی و فیصلہ ئی سرکڑدہ ئی ءِ خراجِ تحسین پیش کیک ہرا سویلی ایشیا ٹی جوہری بھسکاری ءِ توننگ و لکھ آ انسانی جان تے بچفنگ اٹ کمک کرے۔ مدامگی امن ننا قوم آتا روشنا و شونہال آخبت کن غٹ آن اہم بنداوی انگ اولیکو شڑت ءِ۔ یات سلے کہ صدر ٹرمپ تینا سوشل میڈیا پلیٹ فارم آ جاری بیان اٹ پاریسس کہ او بھاز خوش ءِ کہ سعودی عرب، ترکی و پاکستان ”مکہ مکرمہ مشترکہ دفاعی معاہدہ“ آ دستخط کرینو۔ او اودے بھاز بھلن، جیرتی و اولیکو اہم گام اس گوندسا پاریسس کہ دا معاہدہ غان پیدوار مننگ ءِ کہ دے ٹک نیامی نا ملک آک ہراوڑ اسہ ایلو نا خڑک بننگ ءُ و ہراوڑ او تینا دفاع ءِ زیات گچین وڑ اٹ کننگ نا قابل مریرہ۔ صدر ٹرمپ دا معاہدہ غا ترکیہ، سعودی عرب و پاکستان نا سرکڑدہ غاتے مبارکبادی تسوسس۔