مچ آ ملک اٹ 79 می یوم آزادی قومی جم و جوش اٹ اڈ تننگا

پاکستان نا 79 می یومِ آزادی مچ آ ملک اٹی قومی جوش و جوزہ و قول انا پوسکنی تون اڈ تننگا۔ دے انا بنا بنجائی دارالحکومت و صوبائی دارالحکومت آتیٹی توپ آتا سلامی و مسیت آتیٹی ملکی سلامتی، شون، امن و شونہالی کن خصوصی دعاتیان مس، وخت اس کہ نن نا 12 بجہ غا ملک انا جتا جتا شار تیٹی جشنِ آزادی نا دود آک روشنائی و آتش بازی نا رد و ریسہ ٹی بنا کریر۔ ملک انا بھلا شار تیٹی گلی محلہ غاتے بیرک، زمزروک بتی‘ قومی بیرک آتتون زیبا و بیرفنگاسس۔ کراچی، لاہور، اسلام آباد، پشاور، کوئٹہ، ملتان و حیدرآباد تون اوار چندی شار تے ٹی شاریک بھلو کچ اسے ٹی کسر تیا پیش تمار و و ریلی، آتش بازی و ایلو دود آتا کمک اٹ آجوئی نا جشن اڈ تسر۔ یومِ آزادی نا بنا غا بنجائی دارالحکومت اسلام آباد اٹی 31 وخت اس کہ صوبائی دارالحکومت آتیٹی 21 توپ انا سلامی تننگا۔ توپ آتا سلامی نا وخت آ اسلام آباد نا چاگڑداٹ اللہ اکبر نا نعرہ غاتاتوار مس۔ کراچی، لاہور، کوئٹہ، پشاور، گلگت بلتستان و آزاد جموں و کشمیر اٹی ہم پاک فوج انا دستہ غاک قومی ربیدگی نا رداٹ توپ آتا سلامی پیش کریر۔ پاک فوج انا شعبہ تعلقاتِ عامہ (آئی ایس پی آر) نا رداٹ چیف آف آرمی اسٹاف و چیف آف ڈیفنس فورسز فیلڈ مارشل، نیول چیف و ایئر چیف قوم ءِ 79 می جشنِ آزادی نا مبارکبادی تسر۔ آئی ایس پی آر نا رداٹ سلحہ بند فوج کل خلیس آتا برخلاف مادرِ وطن نا دفاع کن تینا نزور مفروک عزم آ سلوک ءِ و و پاکستان نا وتواجہی و علاقائی سلامتی نا رکھوک نا حیثیت اٹ ملکی دفاع نا عزم انا نا دوارگی ءِ کیک۔ ترجمان نا رداٹ بانیانِ پاکستان نا وژن و اصول قوم ءِ پاکستان نا نظریات و اقدار نا پاسداری کن پدریسہ زہمی کیرہ۔ سلحہ بند فوج قوم اتون اسٹ مرسا امن و سوگوی نا رکھ اکن سوگو سلوک مریک۔ 79 می یومِ آزادی نا وخت آ کراچی ٹی بانیِ پاکستان قائد اعظم محمد علی جناح نا مزار آ گارڈ آتا بدلی نا شرفدار ءُ دود اسے نا ہم بست و بند کننگا۔ پاکستان نیول اکیڈمی نا سنبرینگوک کیڈٹ آک مزارِ قائد آ اعزازی گارڈ آتا زمواری تے سنبھالار۔ قومی ربیدگی نا رداٹ ہر سال 14 اگست آ پاکستان نیول اکیڈمی نا کیڈٹ آک مزارِ قائد آ اعزازی گارڈ آتا زمواری تے سنبھالرہ۔ مزارِ قائد آ پندار مروک اعزازی گارڈ آتیٹی اِرا دستہ اوار ءُ، ہرافتے ٹی اسہ پاک بحریہ نا سیلرز وخت اس کہ ارٹمیکو پاکستان نیول اکیڈمی نا کیڈٹ آتیا تالان ءِ‘۔ دود انا خاص انگا مہمان کمانڈنٹ پاکستان نیول اکیڈمی ریئر ایڈمرل محمد عمیر مزارِ قائد آ پُھل آتا چادر شاغا و دعا پاتیہ کرے۔